«Па задумцы гледачы становяцца гасцямі навагодняй вечарынкі, — адзначыла Таццяна Пацай. — Тут будзе ўсё, як і павінна быць на свяце: свечкі, звон бакалаў, танцы і цудоўная музыка. Аднак вечар раптоўна азмрочыць трагедыяй і кожны з гасцей ператворыцца ў падазраванага. Менавіта з гэтага моманту і пачнецца гульня ў „Навагоднюю мафію“. Гледачы будуць адначасова існаваць і ў ігравой, і ў тэатральнай прасторы. Воляй-няволяй яны будуць уцягнуты ў займальную дэтэктыўную гісторыю».

Магілёўскія акцёры дапамогуць удзельнікам навагодняй «заварушкі» акунуцца ў свет, дзе парушаюцца дагаворы і разбураюцца любыя альянсы, а на першы план выходзяць хітрасць і падман. У выніку гасцям вечарынкі неабходна праявіць максімум кемлівасці і інтуіцыі, каб выявіць усіх супернікаў і вывесці іх з тэатральнай гульні. «Аднак трэба быць вельмі асцярожным, бо давер можа стаць здрадай і тады ўдзельнік дакладна не зможа стаць пераможцам», — перасцерагаюць у тэатры.

Такая эксперыментальная гульня праводзіцца ва ўстанове ўпершыню. Дзеянне разгорнецца ў тэатральнай гасцёўні, па сюжэце будзе задзейнічаны і ўнутраны дворык тэатра з устаноўленай там навагодняй ёлкай. Праграма стане вячэрняй і расцягнецца прыкладна на 1,5-2 гадзіны ў залежнасці ад таго, як будзе развівацца сцэнарый таго, што адбываецца. У адной гульні можа прыняць удзел не больш за 16 чалавек. У дэтэктыўную гісторыю з імі будуць таксама ўцягнуты вядучыя майстры сцэны.

Стаць удзельнікам «Навагодняй мафіі» можна з 24 снежня па 9 студзеня. Білет на такі незвычайны квэст можна паднесці і ў якасці святочнага падарунка. Арганізатары show-гульні абяцаюць гасцям шмат уражанняў, эмоцый і сюрпрызаў.

Звязда, 21 снежня 2021