"Увечары філарманічны арган - самы вялікі інструмент у Беларусі - паўстане ў багацці тэмбраў у музыцы Іагана Баха, Вольфганга Моцарта, Марсэля Дзюпрэ, Шарля-Мары Відора, Луі В`ерна, П`ера Кашро", - адзначылі арганізатары.

Праграму канцэрта адкрые Прэлюдыя і фуга Мі-бемоль мажор Іагана Баха. Ва ўстанове адзначылі, што цыкл "Памяці Баха" быў напісаны Шарлем-Мары Відорам да 240-годдзя нямецкага кампазітара. Кожная з шасці п`ес адсылае слухача да пэўнага твора, які лёгка пазнаць дзякуючы яркай тэме.

Госці вечара таксама пачуюць Трэцюю сімфонію французскага кампазітара Луі В`ерна, якую ён прысвяціў свайму калегу Марсэлю Дзюпрэ. "Для гэтага твора характэрна пастаянная змена вобразаў: кожная наступная частка кантрасная папярэдняй. У праграме прагучаць трэцяя і чацвёртая часткі - гэта іскрамётнае Intermezzo і спакойнае Adagio. Завершыць першае аддзяленне канцэрта фінал цыкла Evocation. Гэта сачыненне, напісанае ў 1939 годзе, напоўнена складанымі вобразамі часу паміж дзвюма войнамі", - падкрэслілі ў філармоніі.

У адпаведнасці з праграмай, другое аддзяленне вечара адкрые царкоўная саната Да мажор Вольфганга Моцарта, а ў фінале прагучыць сімфонія П`ера Кашро, якая з`яўляецца імправізацыяй аўтара ў знакамітым саборы Нотр-Дам-дэ-Пары. Ва ўстанове звярнулі ўвагу, што гэты твор ўражвае сваім маштабам, віртуознасцю і ўрачыстасцю.

"Ягор Колесаў паспеў пакарыць мінчан сваімі выступленнямі. Яго выканальніцкая манера вызначаецца арыгінальным перапляценнем традыцый расійскай, галандскай і французскай школ. Ён скончыў Расійскую акадэмію музыкі імя Гнесіных, а таксама стажыраваўся ў Галандыі і Францыі", - рэзюмавалі арганізатары.

23 лістапада 2021, Мінск
БЕЛТА