"Вы ведаеце, на якія пасады назначаецеся. Тры чвэрці краіны мы сёння вашымі пасадамі прыкрываем у гэтай няпростай сітуацыі, якая і ўнутры (складваецца адносна нібыта, кажуць, спакойна, але заспакойвацца нельга), ды і знешне. Вы бачыце, што адбываецца", - сказаў Аляксандр Лукашэнка.

Падрабязна аб кандыдатурах кіраўнік дзяржавы пацікавіўся ў дзяржсакратара Савета бяспекі Аляксандра Вальфовіча і міністра ўнутраных спраў Івана Кубракова. Яны ахарактарызавалі кіраўнікоў УУС як сапраўдных прафесіяналаў, якія добра зарэкамендавалі сябе на папярэдніх пасадах.

"Хлопцы ідуць на пасады такога высокага ўзроўню ўпершыню. Адна справа працаваць намеснікам, іншая справа - узначальваць у гэты, зноў жа паўтаруся, няпросты час гэтыя калектывы. Я жартоўна сказаў, што генералы мяккімі не бываюць. Калі можна мякка прымаць рашэнні - гэта будзе добра. Але выконвацца яны павінны жорстка, - падкрэсліў Прэзідэнт. - Вы людзі ў пагонах, і абстаноўка нам дыктуе, што цырымоніцца мы асабліва не павінны, абараняючы інтарэсы нашых людзей. Мы ж не самі сябе абараняем. Абараніць мільёны людзей (ды і транзітная краіна - інтарэсы перасякаюцца) - вось гэта пытанне".

Аляксандр Лукашэнка адзначыў, што з падзей, якія адбываюцца ў краіне, неабходна рабіць высновы. Паводле яго слоў, праблем па лініі крымінальнай міліцыі хапала ў некаторых абласцях. "Гэта мне губернатар прагаварыўся, а потым я пачаў, як у вас прынята, капаць глыбей: аказваецца, кралі жывёлу і спісвалі на падзеж. Цяпер гэтым пытаннем займаецеся і вы, і пракуратура. Трэба паглядзець на гэта па краіне. Гэта што за "рыначныя" адносіны? Жорстка да гэтага пытання трэба падыходзіць", - заявіў кіраўнік дзяржавы.

"Не трэба забываць аб тых памылках і недахопах, якія ў нас былі. Забудзем - паўторыцца зноў. Таму руку трэба трымаць на пульсе", - дадаў ён.

Прэзідэнт таксама звярнуў увагу новых начальнікаў УУС на неабходнасць быць бліжэй да людзей і паважаць іх, асобна спыніўся на недапушчальнасці карупцыйных праяў. "Утаіць нічога немагчыма. Вы гэта не горш за мяне павінны разумець. Проста пытанне часу - рана ці позна", - папярэдзіў Аляксандр Лукашэнка.

Як паведамлялася, начальнікам упраўлення ўнутраных спраў Мінскага аблвыканкама назначаны Аляксандр Астрэйка. Раней ён займаў пасаду начальніка УУС Брэсцкага аблвыканкама.

УУС Брэсцкага аблвыканкама ўзначаліў Алег Шулякоўскі, які да гэтага займаў пасаду першага намесніка начальніка ўпраўлення ўнутраных спраў Гомельскага аблвыканкама - начальніка крымінальнай міліцыі.

Пасаду начальніка ўпраўлення ўнутраных спраў Гродзенскага аблвыканкама заняў Дзмітрый Разянкоў. Да гэтага часу ён быў першым намеснікам начальніка ўпраўлення ўнутраных спраў Віцебскага аблвыканкама - начальнікам крымінальнай міліцыі.

30 красавіка 2021, Мінск
БЕЛТА