У сувязі з эпідэміялагічнай сітуацыяй развітанне пройдзе ў вузкім коле, паведамляе інтэрнэт-партал TUT.BY. Сям`я Юрыя Анатольевіча просіць ушанаваць яго памяць дома, а замест кветак зрабіць ахвяраванне на барацьбу з COVID-19.
Юрый Зісер нарадзіўся 28 чэрвеня 1960 года ў Львове, яго бацька быў інжынерам, мама - музыкам. Вышэйшую адукацыю атрымаў у Паўночна-Заходнем палітэхнічным інстытуце ў Санкт-Пецярбургу па спецыяльнасці «электронныя вылічальныя машыны». У юнацтве паспеў папрацаваць паштальёнам. Працаваў тэхнікам і праграмістам ў Львове.
У 80-х пазнаёміўся са сваёй будучай жонкай культуролагам Юліяй Чарняўскай і ўслед за ёй з`ехаў у Менск.
Некалькі гадоў быў сістэмным праграмістам у НДІ анкалогіі і медыцынскай радыялогіі ў Бараўлянах, займаўся навукай. У пачатку 90-х правёў два гады ў Лангепасе Цюменскай вобласці - працаваў праграмістам у кааператыве "Паходня".
У 1992 годзе заснаваў кампанію «Надзейныя праграмы», якая займалася распрацоўкай банкаўскага праграмнага забеспячэння. Сістэма абслугоўвання насельніцтва «Праграма 35» выкарыстоўвалася ў больш чым ста банках Беларусі, Расіі, Украіны, Малдовы.
Пасля адукацыйнай паездкі ў ЗША ў 1999 годзе загарэўся ідэяй стварыць беларускі Yahoo - так у 2000 годзе з бясплатнай пошты стартаваў партал TUT.BY.
Стаяў ля вытокаў шэрагу беларускіх і міжнародных інтэрнэт-праектаў. Быў актыўным удзельнікам стартап-руху, ментар. Актыўна займаўся дабрачыннасцю і мецэнацтвам, але аб гэтай сваёй дзейнасці практычна не расказваў. Нягледзячы на хваробу, стаў адным з арганізатараў і спонсараў Міжнароднага фестывалю клезмерской музыкі, які прайшоў у Мінску ў лістападзе 2019 года.
Горача захапляўся класічнай музыкай, любіў джаз. Вырашыў атрымаць другую вышэйшую адукацыю - музычнае. І ў 2013 годзе паступіў у Беларускую дзяржаўную акадэмію музыкі на клас аргана, які паспяхова скончыў у 2015 годзе. Адно з апошніх пачынанняў Юрыя Зісера - аднаўленне арганаў Беларусі. Пры яго фінансавай падтрымцы былі адноўлены арганы ў Мінску, Нясвіжы, Пінску.
Звязда, 17 траўня 2020
