Пра гэтыя публікацыі за 1916 год стала вядома, калі Дзяржаўны архіў Яраслаўскай вобласьці Расеі адкрыў свабодны доступ да аблічбаваных матэрыялаў дарэвалюцыйнай пэрыёдыкі. Цяпер іх вывучаюць у Літаратурным музэі Максіма Багдановіча.

«Падпісаны псэўданімам „Іван Февралевъ“ пяць публікацый. Яны вельмі разнастайныя. Гэта і рэпартэрскія нататкі пра судовае паседжаньне, пра студэнцкую сталовую, небывалую навальніцу. Да таго ж мы выявілі некалькі матэрыялаў, прысьвечаных так званаму „інтымнаму тэатру“», — распавядае Міхаіл Бараноўскі, загадчык Літаратурнага музэя Максіма Багдановіча.

Чатыры нататкі Багдановіча падпісаныя «М.Б.». Інфармацыя пра яшчэ тры псэўданімы правяраецца.

«„Зритель“, „Эхо“, Rion стаяць у нас пад пытаньнем. Гэта псэўданімы, якія называе Сяргей Сьцяпанавіч Каныгін, былы супрацоўнік газэты „Голос“. Справа ў тым, што з Каныгіным зьвязаліся, калі ён быў ужо чалавекам старога веку, бліжэй да 80 гадоў», — кажа Ірына Мышкавец, навуковая супрацоўніца музэю.

«Голос» — лібэральная газета, якая выходзіла ў расейскім Яраслаўлі з 19 лютага (4 сакавіка) 1909 году да лістапада 1917 году. У сувязі з тым, што газэта выказвала думкі лібэральнай апазыцыі, яе рэдактараў неаднаразова правяралі, выданьне тройчы штрафавалі на максымальную суму — 500 рублёў. У 1917 годзе газэту закрылі бальшавікі.

Радыё Свабода, 22 красавіка 2020