Беларускія пракуроры выявілі 90 новых населеных пунктаў, якія паўтарылі лёс спаленай нацыстамі вёскі Хатынь, паведамілі Sputnik у Генеральнай пракуратуры Беларусі.
Гэтыя даныя атрыманы за час расследавання маштабнай крымінальнай справы аб генацыдзе беларускага народа ў гады ВАВ, якая распачата больш за два з паловай гады таму. Сёння ў НАН Беларусі прайшла нарада па вывучэнні звестак, атрыманых у ходзе расследавання гэтай справы.
"Цяпер спісак беларускіх вёсак, якія раздзялілі лёс Хатыні, дапоўнены 90 новымі населенымі пунктамі, цяпер іх колькасць складае 276", - паведамілі ў Генеральнай пракуратуры.
Сёння на нарадзе ў НАН, дзе прысутнічалі кіраўнікі следчай групы па крымінальнай справе аб генацыдзе, былі агучаны новыя даныя па злачынствах нацыстаў і іх памагатых.
"За гады нямецка-фашысцкай акупацыі на тэрыторыі БССР нацысцкія злачынцы знішчылі поўнасцю або часткова, у тым ліку разам з жыхарамі, не менш як 12 289 сельскіх населеных пунктаў", - расказалі ў Генпракуратуры.
Да таго, як была ўзбуджана крымінальная справа аб генацыдзе, дадзеная лічба складала 9 200 населеных пунктаў.
Новыя даныя ў чарговы раз сведчаць аб тым, што маштабы трагічных падзей ВАВ і іх наступстваў нашмат шырэйшыя, чым лічылася раней, падкрэслілі ў наглядным ведамстве.
Атрыманыя звесткі перададуць у мемарыяльны комплекс "Хатынь", каб выкарыстоўваць пры стварэнні новай музейнай экспазіцыі.
Акрамя гэтага, дадзеная інфармацыя будзе накіравана ў Саўмін для разгляду пытання аб яе выкарыстанні ў адукацыйнай, інфармацыйнай, ідэалагічнай і культурнай сферах.
