Заработная плата ўрачоў у Беларусі даведзена да ўзроўню 153% ад сярэдняй па краіне, заявіў кіраўнік Міністэрства аховы здароўя рэспублікі Дзмітрый Піневіч перад пасяджэннем прэзідыума Саўміна, прысвечаным рабоце сістэмы аховы здароўя.

"Зарплаты раслі, мы выйшлі на ўзровень 153% да сярэдняй зарплаты па краіне па ўрачах. Але, на жаль, не дайшлі да сярэдняга медыцынскага персаналу", - сказаў ён.

Міністр таксама адзначыў, што сярод медыцынскіх спецыялістаў нядаўна правялі сацыялагічнае даследаванне аб тым, што для іх з’яўляецца галоўным індыкатарам у рабоце. Паводле яго слоў, на першае месца большасць работнікаў сферы паставілі зарплаты, на другое – унутрыкалектыўны клімат, на трэцяе – магчымасць прафесійнага росту і падрыхтоўкі.

Піневіч падкрэсліў, што на ўсе гэтыя пытанні звяртаў увагу прэзідэнт падчас майскай нарады, і яны будуць удасканальвацца.

Нагадаем, сярэдняя заработная плата па рэспубліцы па стане на кастрычнік 2023 года склала 1 971,2 руб.

Акрамя таго, дадаў кіраўнік медыцынскага ведамства, асаблівая ўвага ўжо ўдзяляецца даступнасці меддапамогі незалежна ад месца пражывання грамадзян, перш за ўсё гэта датычыцца вёскі.

"Таму сумесна з мясцовымі органамі ўлады, губернатарамі, мэрам горада Мінска была асаблівая ўвага ўдзелена першаснаму звяну аховы здароўя, у прыватнасці, фельчарска-акушэрскім пунктам, участковым бальніцам, урачэбным амбулаторыям, паляпшэнню матэрыяльна-тэхнічнай базы гэтых устаноў і ўкамплектаванасці медыцынскім абсталяваннем", - падсумаваў кіраўнік Міністэрства аховы здароўя.

Мінск, 21 снежня 2023
Sputnik