За I паўгоддзе ўвод у эксплуатацыю жылля пасля капітальнага рамонту склаў 560,3 тыс. кв.м, або 105,9 працэнта да плана.

"Заданне выканана. Пры гэтым самыя нізкія тэмпы і аб`ёмы выканання задання па Магілёўскай вобласці і Мінску", - адзначыў Алег Паскробка. Негатыўны ўплыў на рэалізацыю праграмы па капітальным рамонце аказала змяншэнне аб`ёмаў бюджэтнага фінансавання на бягучы год аблвыканкамамі.

"Прымаючы такія рашэнні, вобласці дыскрэдытуюць і сябе, і міністэрства ў вачах Мінфіна. Мы адстойваем лічбы, паказчыкі. У выніку бачым, якія меры прымаюцца на месцах. Хацелася б у будучым гэтага не дапускаць", - сказаў ён.

Алег Паскробка канстатаваў, што на 2016 год устаноўлена заданне па замене 410 ліфтаў, якія адпрацавалі нарматыўныя тэрміны эксплуатацыі. За першае паўгоддзе ў цэлым па рэспубліцы 114 ліфтаў заменена. Па выніках першага паўгоддзя гадавое заданне па бягучым рамонце пад`ездаў забяспечана на 46 працэнтаў.

"Менш выканана ў Мінскай, Віцебскай і Гродзенскай абласцях і Мінску. А адрамантаваныя пад`езды, капітальна адрамантаваныя дамы, кантроль за спажываннем камунальных паслуг - гэта непасрэдны ўплыў на змяншэнне ўзроўню затрат па аказанні паслуг", - падкрэсліў першы намеснік міністра.

Адным з мерапрыемстваў, накіраваных на зніжэнне затрат, з`яўляецца перакладка зношаных сетак. За першае паўгоддзе план выкананы на 102 працэнты, перакладзена 237,6 км сетак.

Заданне па ўводзе энергагенерыруючых магутнасцей на мясцовых відах паліва ў цэлым па рэспубліцы выканана на 13,3 працэнта.

"Найбольшае апасенне выклікаюць у нас Брэсцкая, Гродзенская і Магілёўская вобласці. Нават не пачаліся работы ў Брэсцкай вобласці па 6 аб`ектах, у Гродзенскай - па адным, у Магілёўскай - па трох. Астатнія аб`екты ўсе ў рабоце", - адзначыў Алег Паскробка.

5 жніўня 2016, Мінск
Юлія Огнева - БЕЛТА