Як паведаміў загадчык трупы Купалаўскага тэатра Міхаіл Маеў, апошнім часам у акцёра былі праблемы з ціскам. Магчыма, гэта паўплывала на трагічны зыход. 

Развітанне з народным артыстам адбудзецца ў панядзелак, 17 жніўня, у 11.00 на галоўнай сцэне Купалаўскага тэатра. У 14.00 яго пахаваюць на Усходніх (Маскоўскіх) могілках сталіцы. 

Сяргей Журавель нарадзіўся 1 чэрвеня 1954 года ў Мінску. У 1976 годзе скончыў тэатральны факультэт Беларускага тэатральна-мастацкага інстытута (цяпер Беларуская дзяржаўная акадэмія мастацтваў), атрымаўшы спецыяльнасць акцёра драматычнага тэатра і кіно. 

Пасля завяршэння вучобы і да 1985 года працаваў у Беларускім рэспубліканскім тэатры юнага гледача, потым — у Беларускім дзяржаўным маладзёжным тэатры. З 2009 года ўваходзіў у склад трупы Нацыянальнага акадэмічнага тэатра імя Янкі Купалы. 

У 1999 годзе Сяргей Журавель стаў лаўрэатам прэміі імя Ігната Буйніцкага, а ў 2011-м яму было прысвоенае званне народнага артыста Беларусі.

Апошняй работай Сергея Жураўля была роля Яцака Сапліцы ў "Пане Тадэвушы" паводле Адама Міцкевіча. 

Тэатразнавец Вячаслаў Ракіцкі напісаў на сваёй старонцы ў "Фэйсбуку": "Памёр Сяргей Журавель… Выбітны беларускі акцёр. Больш слоў няма, толькі адчай… Светлая памяць". 

Мінск, 14 жніўня 2015

Захар Шчарбакоў, БелаПАН