У гэты дзень ў 1991 годзе Савет міністраў БССР пастанавіў увекавечваць памяць Францыска Скарыны за мяжой. Якія яшчэ падзеі адбыліся 4 верасня і чым адзначаны гэты дзень у народным календары, чытайце далей:
Гістарычныя падзеі 4 верасня
У 1390 годзе крыжаносцы разам з Вітаўтам напалі на Вільню і спалілі Крывы замак.
У 1776 годзе была створана Полацкая губерня.
У 1991 годзе была прынята пастанова Савета міністраў БССР "Пра ўвекавечанне памяці Францыска Скарыны за мяжой".
Хто нарадзіўся 4 верасня
1714 год: Міхал Карыцкі, беларускі паэт-лацініст.
1884 год: Хведар Імшэнік, беларускі літаратуразнавец, мемуарыст, педагог.
1906 год: Ігнат Дуброўскі, беларускі пісьменнік.
Таксама ў гэты дзень нарадзіліся аўтамабільны канструктар Генры Форд II і амерыканская спявачка Беёнсэ.
4 верасня ў народным календары
Сёння праваслаўныя вернікі ўспамінаюць пакутнікаў Агафоніка, Феафрэпія, Зоціка і іншых.
У народзе Агафоніка называюць Агафон Гуменнік. Існавала павер`е, што ў гэты і наступны дзень з лесу выходзяць лесуны і шкодзяць людзям і дамашнім жывёлам, раскідваюць снапы, псуюць сена. Каб уберагчы маёмасць, гаспадару трэба было ўсю ноч вартаваць сваё гумно з качаргою або іншай металічнай прыладай і абавязкова ў кажусе навыварат. Калі гаспадар не ўпільнаваў, гаспадыня ішла і збірала салому, вымятала з гумна сор.
У лес на Агафона-Гумненніка не хадзілі, каб не злаваць лесуноў яшчэ болей.
Сачылі за надвор`ем: калі дзень быў сонечны, а ў паветры нізенька лятала павуцінне, восень будзе цёплай.
Sputnik, 4 верасня 2023
