Віцебск стане 15-м горадам, якi ўключаны ў дадзеную ініцыятыву. Валанцёры абласнога цэнтра сабралі патрэбную інфармацыю аб пунктах другаснай сыравіны і небяспечных адходаў. 6 кастрычніка яны абмяркуюць на тэматычнай дыскусіі метады ўцягвання насельніцтва ў працэс збору, перапрацоўкі такіх адходаў сумесна з прадстаўнікамі аддзела жыллёва-камунальнай гаспадаркі Віцебскага гарвыканкама, Віцебскай гарадской інспекцыі прыродных рэсурсаў і аховы навакольнага асяроддзя, Цэнтра экалагічных рашэнняў.

«Зялёная карта» — грамадскі некамерцыйны інтэрактыўны праект. Ён уяўляе сабой карту Беларусі ў інтэрнэце, на якую нанесеныя пункты збору другасных матэрыяльных рэсурсаў і непатрэбных рэчаў (напрыклад, бібліятэкі, якія прымаюць кнігі ў дар; сацыяльныя цэнтры; царкоўныя прыходы, якія гатовыя забраць вопратку, і г.д.). Гэты ж рэсурс акумулюе дадзеныя аб усіх ўборках, якія праводзяцца ў Беларусі ў ходзе міжнароднай акцыі «Зробім!». Праект запушчаны ў ліпені 2012 года.

Акрамя таго, у верасні праект «Зялёная карта» выйграў у сацыяльным хакатоне ПРААН у намінацыі «Абарона навакольнага асяроддзя».

Звязда, 4 кастрычніка 2014