З 2013 года ў Беларусі ўводзіцца новы механізм паляпшэння жыллёвых умоў для катэгорый грамадзян, якія маюць права на атрыманне дзяржаўнай падтрымкі, — дзяржаўны заказ на будаўніцтва жылля.
Гэта прадугледжана ўказам № 215 "Аб некаторых мерах па ўдасканаленні будаўніцтва (узвядзення, рэканструкцыі) жылых памяшканняў", які Аляксандр Лукашэнка падпісаў 8 мая.
Як паведамляе прэс-служба прэзідэнта, сутнасць дзяржаўнага заказу заключаецца ў тым, што на этапе будаўніцтва грамадзяне выключаны з інвестыцыйнага працэсу. Будаўніцтва жылых памяшканняў будзе ажыццяўляцца адзінымі дзяржаўнымі заказчыкамі (упраўленнямі капітальнага будаўніцтва — УКБ), а таксама іншымі дзяржаўнымі арганізацыямі ці арганізацыямі з доляй дзяржавы ў статутным фондзе 50% і больш па рашэнні гарадскога, раённага выканаўчага камітэта.
Згаданыя арганізацыі маюць права атрымліваць ільготныя крэдыты, якія выдзяляюцца ААТ "ААБ "Беларусбанк" за кошт рэсурсаў, вызначаных Саветам міністраў па ўзгадненні з банкам, у межах агульнага аб`ёму льготных крэдытаў, прадугледжаных на выкананне праграмы жыллёвага будаўніцтва на чарговы год. Працэнты за карыстанне льготнымі крэдытамі па дзяржаўным заказе ўстанаўліваюцца ў памеры 2% гадавых і выплачваюцца заказчыкамі штомесяц, пачынаючы з месяца, што ідзе за месяцам выдачы крэдыту.
Льготны крэдыт па дзяржаўным заказе выдаецца арганізацыі-заказчыку пры наяўнасці заключэння дзяржаўнай экспертызы праектнай дакументацыі, дазволу на вытворчасць будаўніча-мантажных работ і дагавору будаўнічага падраду.
Максімальны памер такога льготнага крэдыту вызначаецца зыходзячы з каштарыснага кошту будаўніцтва жылога дома на дату пачатку выканання будаўніча-мантажных работ за вылічэннем затрат па вырабе праектнай дакументацыі.
Пагашэнне запазычанасці па льготных крэдытах, выдзеленых заказчыкам, які ажыццяўляе будаўніцтва жылых дамоў па дзяржаўным заказе, будзе ажыццяўляцца пасля пераафармлення запазычанасці на грамадзян, якія ўключаны ў спісы на атрыманне льготных крэдытаў і якія заключылі крэдытныя дагаворы.
Пераафармленне такой запазычанасці на грамадзян выконваецца пасля ўнясення імі ўласных сродкаў, у тым ліку сродкаў аднаразовых субсідый, вызначаных як рознасць паміж коштам жылога памяшкання па дагаворы куплі-продажу і сумай льготнага крэдыту, якая падлягае да атрымання ў адпаведнасці з крэдытным дагаворам.
Дзяржаўным заказчыкам (УКБ мясцовага выканаўчага і распарадчага органа) будуць перададзены ўсе звязаныя з будаўніцтвам фінансавыя і адміністрацыйныя рэсурсы, правы і адказнасць за планаванне, каардынацыю дзеянняў удзельнікаў інвестыцыйнага працэсу, тэрміны, якасць і кантроль кошту жылля.
Важнай перавагай механізму будаўніцтва жылля на аснове дзяржаўнага заказу будзе скарачэнне тэрмінаў будаўніцтва і, як вынік, зніжэнне яго кошту, а таксама прадастаўленне грамадзянам гатовага жылля па цэнах на дату ўводу жылога дома ў эксплуатацыю.
Для будаўніцтва жылых памяшканняў па дзяржзаказе будуць выкарыстоўвацца праекты (серыі) эканамічных жылых дамоў тыпавых спажывецкіх якасцяў, пералік якіх устанаўліваецца Мінбудархітэктуры.
Андрэй Серада,
БелаПАНМінск, 8 мая 2013
