Мінскі гарадскі выканаўчы камітэт задаволіў заяўку на правядзенне 24 сакавіка вулічных акцый у рамках святкавання апазіцыяй Дня Волі. Аб гэтым рашэнні заяўнікаў акцыі праінфармавалі 15 сакавіка ў гарвыканкаме.
Як паведаміў старшыня Партыі БНФ Аляксей Янукевіч, дазвол атрыманы як на правядзенне шэсця, так і мітынгу. Удзельнікі акцыі змогуць сабрацца на пляцоўцы каля кінатэатра "Кастрычнік", а затым прайсці па праспекце Незалежнасці і вуліцы Сурганава да парку Дружбы Народаў, дзе з 14 да 15 гадзін заяўлены мітынг.
Янукевіч выказаў задавальненне рашэннем гарадскіх улад, якія скарэкціравалі толькі месца збору ўдзельнікаў акцыі (у заяўцы значылася пляцоўка каля ўваходу ў Цэнтральны батанічны сад).
Ён таксама паведаміў, што на сустрэчы ў Мінгарвыканкаме прысутнічалі прадстаўнікі пракуратуры і МУС, якія папярэдзілі аб недапушчальнасці парушэння заканадаўства. У прыватнасці, заяўнікам паведамілі, што выкарыстанне банераў і транспарантаў падчас шэсця можа быць расцэнена як парушэнне закона.
Акрамя Янукевіча заяўку на правядзенне акцыі падпісалі прадстаўнікі Аб`яднанай грамадзянскай партыі Уладзімір Раманоўскі, руху "За Свабоду" Юрый Губарэвіч, член аргкамітэта па стварэнні партыі "Беларуская хрысціянская дэмакратыя" Дзяніс Садоўскі.
24 сакавіка дэмакратычныя сілы планавалі таксама правесці ўрачысты сход і канцэрт у Палацы культуры Мінскага трактарнага завода, аднак у арэндзе памяшкання ім было адмоўлена ў сувязі з правядзеннем "культурна-відовішчнага мерапрыемства".
Дзень Волі штогод адзначаецца дэмакратычнай грамадскасцю краіны, ён прымеркаваны да даты абвяшчэння Беларускай Народнай Рэспублікі (25 сакавіка 1918 года). Сёлета ў аргкамітэт па святкаванні ўвайшлі прадстаўнікі дэмакратычных партый і грамадскіх ініцыятыў, у тым ліку Партыі БНФ, Аб`яднанай грамадзянскай партыі, руху "За Свабоду", кампаніі "Еўрапейская Беларусь", аргкамітэта па стварэнні БХД і іншых структур.
Сяргей Каралевіч,
БелаПАНМінск, 15 сакавіка 2013
