У Генеральную пракуратуру Беларусі пакуль не паступала інфармацыя з Генеральнай пракуратуры Літвы пра палёт 4 ліпеня над беларускай тэрыторыяй самалёта са шведамі, якія скінулі плюшавых мядзведзяў з запіскамі ў падтрымку дэмакратыі.
Аб тым, што літоўскі бок прадаставіў беларускаму інфармацыю пра "плюшавы дэсант", паведаміў 21 снежня партал ru.delfi.lt.
Размова ішла пра тое, што Генпракуратуры перададзена інфармацыя, звязаная з дасудовым расследаваннем аб незаконным перасячэнні дзяржмяжы лёгкім самалётам, якое праводзіцца ў Літве. Якая інфармацыя перададзена беларускаму боку, не дэталізавалася. Зазначалася толькі, што яна прадастаўлена на падставе двухбаковага міжнароднага дагавора аб прававой дапамозе і прававых адносінах па грамадзянскіх, сямейных і крымінальных справах.
Пасля паступлення інфармацыі ў Генпракуратуру Беларусі яна будзе перададзена ў Камітэт дзяржаўнай бяспекі, які праводзіць расследаванне гэтага інцыдэнту.
Нагадаем, аднаматорны самалёт са шведскім экіпажам з супрацоўнікаў кампаніі Studio Total з плюшавымі мішкамі на борце перасек паветраную мяжу Беларусі раніцай 4 ліпеня. Ён правёў у паветранай прасторы краіны каля паўтары гадзіны і скінуў над Івянцом і ўскраінай Мінска больш чым 800 цацак з запіскамі ў падтрымку дэмакратыі ў Беларусі.
Пакуль арганізатары акцыі не выклалі ў інтэрнэт відэа з пацвярджэннем факта іх палёту над Беларуссю, беларускія ваенныя і памежнікі катэгарычна адмаўлялі інфармацыю аб незаконным перасячэнні мяжы. Гісторыя з "плюшавым дэсантам" атрымала шырокі грамадскі рэзананс і дала падставу сумнявацца ў боегатоўнасці не толькі беларускіх, але і саюзных сродкаў СПА.
Аляксандр Лукашэнка вызваліў ад пасад старшыню Дзяржпагранкамітэта Ігара Рачкоўскага і камандуючага ВПС і СПА генерал-маёра Дзмітрыя Пахмелкіна.
Беларускія ўлады 8 жніўня звярнуліся да Літвы і Швецыі з просьбай аказаць прававую дапамогу ў расследаванні справы аб парушэнні беларускай мяжы шведскім самалётам.
9 жніўня Лукашэнка падчас наведвання будаўнічай пляцоўкі АЭС у Астравецкім раёне Гродзенскай вобласці заклікаў Літву не сядзець "як мышы пад венікам". "Яны нам павінны адказаць, чаму далі сваю тэрыторыю для парушэння дзяржаўнай мяжы. Каму-каму, а Літве ў гэтым плане мала не падасца", — заявіў кіраўнік дзяржавы.
16 жніўня літоўскі бок паведаміў, што Служба аховы дзяржаўнай мяжы Літвы пачала расследаванне.
Вячаслаў Будкевіч,
БелаПАНМінск, 29 снежня 2012
