Аляксандр Бароўскі, генеральны дырэктар ААТ "МАЗ", паказаў госцю ўсе навінкі завода (сярод якіх і капотны грузавік, і новыя самазвалы з правым рулём, зробленыя спецыяльна для паставак на індыйскі рынак, і шмат іншага). Пасля правёў па зборачным канвееры, дзе Уладзімір Андрэйчанка пагутарыў з працаўнікамі прадпрыемства. "Самае галоўнае, што я заўважыў падчас агляду завода, — людзі не гавораць пра мінулае. Яны гавораць пра будучыню, пра тое, як далей будзе развівацца прадпрыемства, — падкрэсліў ён ужо ў гутарцы з журналістамі. — Мне спадабалася, што высілкі кіраўніцтва прадпрыемства, рабочых сканцэнтраваны на такіх пытаннях, як павышэнне заработнай платы. Рост заробкаў тут усе звязваюць выключна з адпаведным ростам прадукцыйнасці працы, укараненнем новай тэхнікі і тэхналогій, нарошчваннем паставак прадукцыі, эканоміі, беражлівасці". Дарэчы, на прадпрыемстве гэта вытрымліваецца: выраслі аб`ёмы вытворчасці на 27%, пастаўкі прадукцыі на экспарт — на 40%. МАЗ зарабляе валюту — дадатнае сальда складае 50 млн долараў. "Пытанні эканоміі тут таксама правільна вырашаюцца: завод адмовіўся ад незапатрабаваных працэдур і прафесій. Будучыня ў МАЗа, я лічу, ёсць. І вельмі сур`ёзная", — сказаў у выніку Уладзімір Андрэйчанка. А потым нагадаў, што пасля запуску Адзінай эканамічнай прасторы павялічыліся пастаўкі ў Казахстан і Расію, што дае дадатковы штуршок для развіцця завода.

Уладзіслаў Кулецкі
Звязда, 17 сакавіка 2012