Пацярпелыя, сярод якіх пяцігадовае дзіця і 15-гадовы падлетак, знаходзяцца на стацыянарным лячэнні ў Гродзенскай абласной інфекцыйнай клінічнай бальніцы. Іх стан ацэньваецца як здавальняючы. Акрамя таго, выяўлены яшчэ 15 чалавек, якія елі заражанае мяса. Ім назначана прафілактычнае лячэнне, за станам іх здароўя сочаць медыкі. Як удакладнілі ў МНС, прычынай масавага захворвання стала ўжыванне мяса дзіка, здабытага паляўнічымі ў вёсцы Камяністая Гродзенскага раёна.

Трыхінелёзам хварэюць драпежныя (сабакі, лісы), усёедныя (свінні, мядзведзі, грызуны) і іншыя жывёлы. Чалавек заражаецца пры ўжыванні сырога або недаваранага мяса заражаных жывёл. Трыхінелёз праходзіць цяжка і часта з сур`ёзнымі ўскладненнямі.

Павышаецца тэмпература да 38-40 градусаў, з`яўляюцца слабасць, болі ў горле, пачырваненне вачэй, болі ў жываце, млоснасць, ацёкі на твары, галоўным чынам ацёкі павекаў. Каб пазбегнуць атручэння, рэкамендуецца ўжываць у ежу толькі тое мяса і мясапрадукты, якія прайшлі экспертызу, не спрабаваць на смак сыры фарш. Лічынкі трыхіны гінуць пры гатаванні на працягу 2,5 гадзіны, таўшчыня кавалка павінна быць не большай за 8 см. Мяса дзіка неабходна абавязкова даследаваць на трыхінелёз у ветэрынарнай лабараторыі рынку.

Звязда, 10 кастрычніка 2011