Супрацоўнікі ўпраўлення дэпартамента фінансавых расследаванняў Камітэта дзяржкантролю па Гродзенскай вобласці раскрылі аферу, у якой былі задзейнічаныя дырэктар і галоўны бухгалтар прыватнага прадпрыемства "Беларніка" (Слонім), паведаміла прэс-служба КДК.
Дзве жанчыны 1973 і 1975 г.н. выраблялі для сябе і сваіх знаёмых фальшывыя даведкі для афармлення крэдыту, у якіх былі ўказаныя непраўдзівыя звесткі пра месца працы і памеры заработнай платы. Гэта дазваляла ім браць у банках крэдыты на вялікія сумы. Разам з атрымальнікам крэдытаў, кіраўнікі ПГУП "Беларніка" выраблялі даведкі аб даходах і для паручыцеляў.
Увогуле супрацоўнікі фінансавай міліцыі ўстанавілі 29 фактаў выдачы падложных даведак пра даходы, якія ў будучым былі прадстаўлены ў розныя банкі Гродзенскай вобласці. Махінацыі з падробленымі дакументамі працягваліся з сакавіка 2008 года па кастрычнік 2009 года. За гэты час з выкарыстаннем падложных даведак пра даходы ў банках было атрымана крэдытаў на агульную суму больш як 315 млн. рублёў.
Дырэктару і галоўнаму бухгалтару ПГУП "Беларніка" было прад`яўлена абвінавачанне ва ўчыненні злачынстваў, прадугледжаных ч. 1 арт. 427 (службовы падлог), чч. 1 і 2 арт. 380 (падробка, выраб, выкарыстанне або збыт падробленых дакументаў, штампаў, пячатак, бланкаў) КК Рэспублікі Беларусь. Судом Слоніма яны прыгавораныя да розных тэрмінаў абмежавання волі. Прыгавор увайшоў у законную сілу.
Марына Носава,
БелаПАНМінск, 28 сакавіка 2011
