Ён таксама перасцярог ад "развалу ўлады": "Нам не трэба бяздумнай ломкі палітычнай сістэмы, з такой цяжкасцю створанай па крупінках". "Развал улады — гэта развал дзяржавы", — упэўнены Лукашэнка.

"Я не кажу, што ў нас ідэальная палітычная сістэма, я не кажу, што на вякі трэба захаваць гэтую сістэму, — дадаў ён. — Але пакуль яна дае вынік, яе трэба захоўваць і падтрымліваць".

Лукашэнка таксама ўпэўнены, што пры выбары прэзідэнта беларускі народ не мае патрэбы ў знешніх парадах. "Воля беларускага народа — адзіная легітымная сіла, якая можа выбіраць лёс дзяржавы, і яна не мае патрэбы ні ў якіх знешніх парадах", — заявіў ён.

"Самым сумленным" з альтэрнатыўных кандыдатаў у прэзідэнты дзейны кіраўнік дзяржавы лічыць прадстаўніка Партыі БНФ Рыгора Кастусёва: "Ён разумее, што нацыяналізм мы ўжо перажылі, але ён дастае свой бел-чырвона-белы сцяжок і пачынае размаўляць па-беларуску, ведаючы, што яго ніхто не разумее".

Астатнія кандыдаты, паводле выразу Лукашэнкі, "перарабіліся". "Некаторых з іх я ратаваў ад турмы, а сёння яны, тыцкаючы ў экран, пачынаюць аплёўваць прэзідэнта", — дадаў ён.

Журналісты, паводле слоў Лукашэнкі, здзіўляюцца: прэзідэнт, маўляў, сказаў, што ўсе кандыдаты празаходнія, а яны фінансуюцца ў Расіі. "Тут няма ніякай супярэчнасці. Сёй-той у Расіі хацеў бы, як і хочуць на Захадзе, звергнуць у Беларусі існуючую ўладу. Вось і супадзенне інтарэсаў", — заявіў кіраўнік дзяржавы.

Але галоўнае, зазначыў ён, у тым, што "самыя празаходнія сёння загаварылі пра рускіх і расіянаў, хаця 15 гадоў таму садзілі ўсіх рускіх на чамаданы".
Агрэсіўнасць выбарчых кампаній апазіцыйных кандыдатаў Лукашэнка тлумачыць наступным чынам: "яны хочуць паказаць спонсарам, што грошы адпрацавалі".

БелаПАН
Мінск, 7 снежня 2010