Мінск               Таццяна Паляжай           БЕЛТА

 

У Беларусі з 1 студзеня 2010 года павялічаны на 10 працэнтаў памер вучэбных стыпендый студэнтам і навучэнцам, якія вучацца па спецыяльнасцях у атамнай энергетыцы. Адпаведны ўказ нумар 89 Прэзідэнт Беларусі падпісаў 26 лютага, паведамілі БЕЛТА ў прэс-службе кіраўніка дзяржавы.

 

У прыватнасці, павелічэнне стыпендый закране тых, хто вучыцца па спецыяльнасцях: ядзерная фізіка і тэхналогіі, радыяцыйная хімія, радыяхімія, электронныя сістэмы кантролю і кіравання на атамных электрастанцыях, паратурбінныя ўстаноўкі атамных электрастанцый, будаўніцтва цеплавых і атамных электрастанцый, ядзерная і радыяцыйная бяспека.

 

Гэта мера накіравана на павышэнне зацікаўленасці моладзі ў атрыманні гэтых складаных, звязаных з пэўнай рызыкай, але вельмі неабходных дзяржаве спецыяльнасцей, растлумачылі ў прэс-службе.

Указам таксама павялічана на Br100 тыс. стыпендыя Прэзідэнта Рэспублікі Беларусь. Яе памер складзе Br300 тыс., што дасць магчымасць прывесці яе ў адпаведнасць з іншымі відамі дзяржаўных стыпендый навучэнскай моладзі.

Памер усіх відаў стыпендый у Беларусі павялічаны на 5 працэнтаў

 
Памер усіх відаў дзяржаўных стыпендый навучэнскай моладзі ў Беларусі з 1 студзеня 2010 года павялічаны на 5 працэнтаў. Указ аб гэтым нумар 90 Прэзідэнт Беларусі падпісаў 26 лютага, паведамілі БЕЛТА ў прэс-службе кіраўніка дзяржавы.

 

Так, памер стыпендый для студэнтаў ВНУ складзе ад Br102,5 тыс. да Br164,1 тыс., для навучэнцаў устаноў, якія забяспечваюць атрыманне сярэдняй спецыяльнай і прафесійна-тэхнічнай адукацыі, - ад Br86,1 тыс. да Br137,6 тыс.

 

Як адзначылі ў прэс-службе, указ прыняты ў мэтах далейшага ўзмацнення сацыяльнай абароны навучэнскай моладзі.