Два кухары сталічнага рэстарана затрыманы за незаконны абарот наркотыкаў

Супрацоўнікі наркакантролю і аддзела ДАІ Цэнтральнага РУУС сталіцы паблізу ляснога масіву па падазрэнні ў незаконным абароце наркотыкаў з доказамі злачынства затрымалі дваіх мінчукоў (23 і 38 гадоў), якія перамяшчаліся на аўтамабілі.

Па інфармацыі ГУУС Мінгарвыканкама, падчас агляду транспартнага сродку аператыўнікі знайшлі і канфіскавалі звыш 10 грамаў небяспечнага наркатычнага сродку гашыш.

Устаноўлена, што вадзіцель у момант кіравання аўтамашынай знаходзіўся ў стане наркатычнага ап’янення. Абодва затрыманыя працуюць кухарамі ў адным са сталічных рэстаранаў дастаўкі азіяцкай ежы.

Па словах падазраваных, наркотыкі яны набылі ў даркнэце, частку з іх павінны былі перадаць яшчэ аднаму свайму калегу.

Следчым заведзена крымінальная справа за незаконны абарот наркотыкаў.

Сяргей Расолька
Звязда, 1 лістапада 2022