Дзяржаўны доўг Рэспублікі Беларусь на 1 мая 2012 года склаў 112,4 трлн. рублёў і зменшыўся ў параўнанні з пачаткам 2012 года на 4 трлн. рублёў, або на 3,4%.
Як паведамляе Міністэрства фінансаў, змяншэнне дзярждоўгу (у беларускіх рублях) у першую чаргу абумоўлена пераацэнкай знешняга дзяржаўнага доўгу з-за ўмацавання нацыянальнай валюты ў студзені—красавіку 2012 года.
Знешні дзяржаўны доўг па стане на 1 мая 2012 года склаў 11,8 млрд. долараў ЗША пры ўстаноўленым ліміце 14,3 млрд. долараў ЗША, зменшыўшыся з пачатку года на 14,2 млн. долараў ЗША.
Як тлумачыць Мінфін, змяншэнне знешняга дзяржаўнага доўгу ў 2012 годзе абумоўлена пагашэннем часткі асноўнага доўгу па крэдыце стэнд-бай МВФ.
Унутраны дзяржаўны доўг з пачатку 2012 года зменшыўся на 0,4 трлн. рублёў, на 1 мая 2012 года склаўшы 17,5 трлн. рублёў пры ўстаноўленым ліміце 34 трлн. рублёў.
Змяншэнне ўнутранага дзяржаўнага доўгу ў 2012 годзе абумоўлена пагашэннем дзяржаўных каштоўных папер і ўмацаваннем курсу нацыянальнай валюты, паведамляе міністэрства.
Аляксей Арэшка,
БелаПАНМінск, 2 чэрвеня 2012
