Спецыялісты галіны падлічылі, што ў 2013 годзе для льготных катэгорый грамадзян будзе пабудавана не менш як 2,5 млн квадратных метраў жылля. Як паведамляе першы намеснік міністра архітэктуры і будаўніцтва Ірына Архіпава, для скарачэння тэрмінаў будаўніцтва жылля прадугледжана выкарыстоўваць толькі праекты максімальна танных шматкватэрных дамоў, якія маюцца ў тэхналогіях буйнапанэльнага домабудаўніцтва.

Згодна з праектам Канцэпцыі дзяржаўнай жыллёвай палітыкі Беларусі на 2011—2015 гады, менавіта да 2015 года плануецца павялічыць долю індывідуальнага жыллёвага будаўніцтва ў агульным аб`ёме ўводу жылля да 50%. Дзеля гэтага прадугледжваецца выдзяляць жыллёвым чаргавікам штогод 20—30 тысяч зямельных участкаў на тэрыторыях каля населеных пунктаў, у тым ліку ў аграгарадках. Для будучых індывідуальных будаўнікоў з боку дзяржавы прапануюць спецыяльныя невялікія бонусы. Гэта бясплатнае прадастаўленне тыпавых праектаў жылых дамоў розных спажывецкіх якасцяў, пашыраны асартымент айчынных будматэрыялаў, якія можна будзе набываць з растэрміноўкай на нарматыўны тэрмін будаўніцтва. Тыя, хто будуе ўласнае індывідуальнае жыллё, атрымаюць маёмасны падатковы вылік на суму сродкаў, якія накіроўваюцца на будаўніцтва.

Сяргей Куркач
Звязда, 24 мая 2012