Вірус хоць і страціў актыўнасць, але ўсё ж не знік з папуляцыі, адзначыў міністр. "Таму мы цяпер пераходзім да наступнага этапу - рыхтуюцца загады аб асаблівасцях функцыянавання арганізацый аховы здароўя ва ўмовах каранавіруснай інфекцыі. Няма неабходнасці трымаць такую колькасць бальніц менавіта для гэтых пацыентаў, але мы павінны быць гатовы аказваць меддапамогу, калі такі пацыент выпадкова апынецца ў любой з медустаноў нашай краіны", - сказаў Уладзімір Каранік.

На выпадак другой хвалі гатовы планы па рэагаванні і перапрафіляванні ложкавага фонду. Бальніцы дааснашчаюцца кропкамі рэспіраторнай падтрымкі, скарэкціраваны графікі завяршэння рэканструкцыі і будаўніцтва новых аб`ектаў, ствараюцца рэзервы сродкаў індывідуальнай аховы, каб у выпадку неабходнасці задаволіць у тым ліку ажыятажны попыт насельніцтва.

"У апошні тыдзень мы назіраем устойлівую станоўчую дынаміку, гэта датычыцца як выяўленых выпадкаў інфіцыравання, так і (што найбольш важна) колькасці ўскладненых форм захворвання, тых пацыентаў, у каго ход каранавіруснай інфекцыі ўскладняецца пнеўманіямі. За месяц колькасць інфіцыраваных і колькасць пнеўманій знізілася ў некалькі разоў, што дае магчымасць назад перапрафіляваць ложкавы фонд ва ўсіх рэгіёнах краіны. Бальніцы вяртаюцца да звычайнага рэжыму функцыянавання", - адзначыў міністр.

Калі насцярожанасць з боку насельніцтва і сацыяльнае дыстанцыраванне застануцца і ў далейшым, то разам з проціэпідэмічнымі мерапрыемствамі і планавай работай па адсочванні кантактаў гэта дасць магчымасць прайсці другую хвалю або лягчэй, або не вельмі яе заўважыць, дадаў Уладзімір Каранік.

9 ліпеня 2020, Мінск
БЕЛТА