Шосты пацыент быў выпісаны ўвечары ў сераду,  яшчэ двое атрымалі першыя адмоўныя тэсты і рыхтуюцца да выпіскі.

Толькі 9 пацыентаў маюць клінічныя прыкметы інфекцыі. Яшчэ на кантролі знаходзяцца 37 пацыентаў з станоўчымі лабараторнымі тэстамі, але без клінічных праяў хваробы. Ярка выяўленых прыкмет каранавіруса ў іх не назіраецца. У стане сярэдняй цяжкасці, але з станоўчай дынамікай зараз знаходзіцца адзін пацыент. Медыкі адзначаюць, што сёння ў краіне 17 завозных выпадкаў COVID-19, астатнія выяўлены ў кантактных асоб першага ўзроўню.

- Сітуацыя на сённяшні дзень намі расцэньваецца як цалкам кантралюемая, - заявіла намесніца міністра аховы здароўя Беларусі Алена Богдан. - У дадзены момант пад наглядам знаходзяцца больш за 1900 асобаў, якія адносяцца да кантактаў першага і другога ўзроўню. Я павінна сказаць, што дэталёвыя планы па перапрафіляванне ложкавага фонду і змене арганізацыі працы сёння ёсць, пачынаючы з устаноў горада Мінска, рэспубліканскіх навукова-практычных цэнтраў да цэнтральных раённых бальніц. Па кожнай цэнтральнай раённай бальніцы ёсць аналагічныя планы дзеянняў у выпадку з`яўлення пацыентаў з падазрэннем на каранавірус альбо па ізаляцыі і гэтак далей.

Завершаны двухтыднёвы каранцін больш чым для 2 700 асоб, якія прыбылі з закранутых захворваннем раёнаў.

У сераду Міністэрства аховы здароўя паведаміла пра 16 новых выпадкаў каранавіруса ў Беларусі. Агульная колькасць тых, каму быў пастаўлены гэты дыягназ, дасягнула 51 чалавека.

Звязда, 19 сакавіка 2020