21 студзеня Аляксандр Лукашэнка, паводле Канстытуцыі, прынёс у Палацы Рэспублікі ўрачыстую прысягу прэзідэнта Рэспублікі Беларусь і афіцыйна заняў пасаду.
"Займаючы пасаду прэзідэнта Рэспублікі Беларусь, урачыста клянуся аддана служыць народу Рэспублікі Беларусь, паважаць і ахоўваць правы і свабоды чалавека і грамадзяніна, выконваць і абараняць Канстытуцыю Рэспублікі Беларусь, свята і добрасумленна выконваць ускладзеныя на мяне высокія абавязкі", — зачытаў па-беларуску Лукашэнка тэкст прысягі.
Прысяга прынесена ў прысутнасці дэпутатаў Палаты прадстаўнікоў, членаў Савета Рэспублікі, суддзяў Канстытуцыйнага, Вярхоўнага і Вышэйшага гаспадарчага судоў, іншых высокапастаўленых чыноўнікаў і замежных гасцей і трансліравалася ў прамым эфіры па асноўных беларускіх тэлеканалах.
Паводле даных МЗС, прысутнасць на цырымоніі інаўгурацыі пацвердзілі 32 кіраўнікі замежных дыпламатычных устаноў і прадстаўніцтваў міжнародных арганізацый.
Праігнаравалі цырымонію паслы краін Еўрасаюза — 21 студзеня яны пакінулі тэрыторыю Беларусі і цяпер знаходзяцца ў Вільнюсе. Як растлумачыла Мая Качыянчыч, прэс-сакратар вярхоўнага прадстаўніка ЕС па замежных справах і палітыцы бяспекі Кэтрын Эштан, еўрапейскія паслы не будуць удзельнічаць у цырымоніі ў знак пратэсту супраць фальсіфікацыі выбараў і рэпрэсій у дачыненні да апазіцыі і грамадзянскай супольнасці ў Беларусі.
Не прысутнічаў на інаўгурацыі Лукашэнкі і кіраўнік амерыканскага пасольства — часовы павераны ў справах ЗША ў Беларусі Майкл Скэнлан, які сёння знаходзіцца ў Гродне.
Чацвёртыя выбары прэзідэнта Беларусі адбыліся 19 снежня 2010 года. Паводле даных Цэнтрвыбаркама, Аляксандр Лукашэнка набраў 79,65% галасоў выбаршчыкаў.
Вечарам 19 снежня ў цэнтр Мінска выйшлі дзясяткі тысяч грамадзян, не згодных з афіцыйнымі вынікамі выбараў. Дэманстрацыя была жорстка падаўлена ўладамі.
Па факце масавых беспарадкаў у сталіцы распачата крымінальная справа. Абвінавачанне прад`яўлена 33 палітычным і грамадскім актывістам, у тым ліку пяці былым кандыдатам у прэзідэнты. Усе яны змешчаны пад варту, ім пагражае турэмнае зняволенне да 15 гадоў.
Разгон дэманстрацыі, а таксама наступны пераслед прадстаўнікоў грамадзянскай супольнасці і СМІ выклікалі вельмі негатыўную рэакцыю ў краіне і за мяжой.
БелаПАНМінск, 21 студзеня 2011
