Пасля даручэння кіраўніка дзяржавы планавая медыцынская дапамога беларусам аказваецца ў поўным аб`ёме, заявіў сёння міністр аховы здароўя Дзмітрый Піневіч, яго цытуе афіцыйны telegram-канал Міністэрства аховы здароўя.

Па словах міністра, у сітуацыі з узроўнем захворвання на каронавірусную інфекцыю ёсць моманты, якія ўсяляюць асцярожны аптымізм.

"Самі па сабе тэмпы прыросту захворвання трохі памяншаюцца. У апошні тыдзень мы бачым вельмі нязначную, але тэндэнцыю па зніжэнні тэмпаў шпіталізацыі пацыентаў у стацыянары", - запэўніў кіраўнік Міністэрства аховы здароўя.

Дзмітрый Піневіч распавёў таксама, што на некалькі чалавек у суткі зніжаецца і колькасць пацыентаў, якія знаходзяцца на апаратах штучнай вентыляцыі лёгкіх. Пры гэтым канстатаваў, што лічбы ўсё роўна высокія.

"Сітуацыя патрабуе ад нас намаганняў, таму мы працягваем усіх пераконваць вакцынавацца. Першую дозу зрабілі ўжо больш за 27% беларусаў, і мы прапануем і надалей працягваць прышчапляцца тым, хто гэтага не зрабіў", - адзначыў міністр.

Піневіч дадаў, што Міністэрства аховы здароўя удакладніла паказанні і тэрміны рэвакцынацыі і цяпер прапануе прайсці гэтую працэдуру ўсім жадаючым.

"Можна спрачацца пра вакцынацыю колькі заўгодна. Але з рэаніматолагамі, якія кожны дзень лечаць найцяжкіх пацыентаў, спрачацца вельмі складана, а з патолагаанатамамі - дарэмна", - нагадаў Дзмітрый Піневіч.

На думку міністра аховы здароўя, візітнай карткай беларускай сістэмы аховы здароўя з`яўляецца высокая даступнасць медыцынскай дапамогі. Таксама ў рэспубліцы аказваецца якасная дапамога ў сферы аховы мацярынства і дзяцінства. Акрамя гэтага, у нас даступны высокія медыцынскія тэхналогіі.

"Падчас эпідэміі аказанне спецыялізаванай меддапамогі або, скажам так, яе непрэрыванне - адметная рыса нашай мадэлі. Па ўсёй краіне перапрафіляваны крыху больш за 40% ложкавага фонду. Але ўсе РНПЦ ў поўным аб`ёме працягваюць аказваць планавую дапамогу", - падкрэсліў кіраўнік Міністэрства аховы здароўя.

Пры гэтым ён звярнуў увагу, што бальніцы ў абласных цэнтрах аказваюць планавую дапамогу і часткова перапрафіляваны пад інфекцыёнкі для пацыентаў з каронавірусам.

"Разам з тым, выдатна разумеем, можа быць, лепш, чым хто-небудзь, што жывем у ваенны час. Пандэмія - гэта вайна. Таму даручэнне Кіраўніка дзяржавы ўспрымаем як даручэнне, якое падлягае безумоўнаму выкананню, як у ваенны час", - растлумачыў сітуацыю Дзмітрый Піневіч.

Па словах міністра, беларускія медыкі цяпер працуюць як героі ў вельмі складаных умовах. Узмацненне жорсткасці патрабаванняў да таго, як аказваць планавую дапамогу аказалася вельмі складанай задачай для беларускай медыцынскай сістэмы.

"Але мы адкарэктавалі планы, пачынаючы з самага маленькага цэнтра і заканчваючы буйнымі. Планавая дапамога адноўлена ў поўным аб`ёме - у тым, у якім гэта неабходна і ў якім яна не будзе з`яўляцца эпідэміялагічнай пагрозай для саміх пацыентаў", - запэўніў міністр.

Піневіч з упэўненасцю заявіў, што ўдалося ліквідаваць усе складанасці з лагістыкай пры пастаўках замежных лекаў. На гэта выдзелены грошы, а неабходныя кантракты падпісаны.

"Учора да нас прыбыла дадатковая пастаўка Рэмдэсівіра (запасы яго мы будзем папаўняць пастаянна), таксама прыйшлі і іншыя, важныя для лячэння кавідных пнеўманій прэпараты. Спадзяюся, што якіх-небудзь форс-мажорных абставін звонку не будзе", - сказаў ён.

Пасля чаго нагадаў, што падчас першай хвалі каронавіруса былі складанасці з індывідуальнымі сродкамі аховы, але ў цяперашні час гэтую праблему вырашылі шляхам імпартазамяшчэння. "Мы самі робім маскі, касцюмы і тэсты. У лекавай палітыцы рухаемся па гэтым жа шляху", - выказаў упэўненасць міністр.

Прычым пытанне забеспячэння кіслародам застаецца на кантролі ведамства, таму што яго спажыванне вырасла шматразова. Таму асноўнаму прадпрыемству па выпуску кіслароду "Крэон" аказваюць дапамогу іншыя.

У завяршэнне Дзмітрый Піневіч заклікаў берагчы адзін аднаго і выконваць усе рэкамендацыі медыкаў. Таму што гэта зніжае нагрузку на сістэму аховы здароўя і ўсяляе ў людзей пачуццё бяспекі.

Sputnik, 23 кастрычніка 2021