Паводле слоў Аляксандра Вальфовіча, адпаведная работа была праведзена і ў Расіі. Цяпер план прымянення рэгіянальнай групоўкі войскаў будзе вынесены на пасяджэнне Вышэйшага дзяржаўнага савета СД, правядзенне якога плануецца ў снежні гэтага года.

Распрацоўкай плана прымянення РГВ займаліся генеральныя штабы Расіі і Беларусі з улікам прагнозу стратэгічнай і ваенна-палітычнай абстаноўкі. Як падкрэсліў Аляксандр Вальфовіч, сумесная групоўка разглядаецца перш за ўсё як механізм стратэгічнага стрымлівання, а таксама і адлюстравання буйнамаштабнай агрэсіі супраць Саюзнай дзяржавы.

"У нас мірная дзяржава. Мы разглядаем толькі пытанні, звязаныя з абаронай нашай краіны. Зразумела, нікому яе не ўступім. Але прадугледжваем і ацэньваем, як будуць дзейнічаць магчымыя праціўнікі. Таму ўдакладнены варыянты дзеянняў зыходзячы з той інфармацыі, якой мы сёння валодаем, у тым ліку па парадку задзейнічання і раёнаў прымянення злучэнняў і часцей, якія прыходзяць з расійскага боку для выканання сумесных задач. У мінулым плане яны былі ў адных раёнах, у гэтым плане з улікам прагнозу абстаноўкі некалькі іншыя раёны, задачы", - растлумачыў ён.

У перапрацаваным плане таксама ўдакладнены баявы склад рэгіянальнай групоўкі войскаў.

"За пяць гадоў змянілася і структура, і тэхніка, і ўзбраенне, з`явіліся новыя ўзоры як у Расійскай Федэрацыі, так і ў Рэспубліцы Беларусь. Мы не стаім на месцы, закупляем новыя ўзоры. Яны валодаюць больш магутнымі баявымі магчымасцямі. Упор робім на закупку ўзораў нашага ваенна-прамысловага комплексу, набываем і ў Расійскай Федэрацыі. Паколькі вырашаць нам задачы трэба будзе сумесна, разам з братамі расіянамі, таму і зброя ў нас павінна быць аднолькавая", - растлумачыў кіраўнік Генштаба.

Як паведамлялася, міністр абароны Віктар Хрэнін і начальнік Генеральнага штаба Узброеных Сіл Аляксандр Вальфовіч сёння прадставілі Аляксандру Лукашэнку прапановы па перапрацоўцы плана прымянення рэгіянальнай групоўкі войскаў Беларусі і Расіі.

Прэзідэнт нагадаў, што яшчэ раней былі дасягнуты дамоўленасці аб тым, каб асучасніць, актуалізаваць план прымянення сумеснай групоўкі войскаў з улікам сітуацыі на заходніх граніцах і ў свеце наогул.

"Сёння я хацеў бы пачуць, што новага ў сувязі з перапрацаванымі дакументамі і што трэба нам яшчэ зрабіць (калі неабходна), таму што нагнятанне абстаноўкі ідзе. Як бы мы тут ні заяўлялі, як бы нас ні заспакойвалі і кіраўніцтва ЗША, а цяпер і кіраўніцтва НАТА. Гавораць, апраўдваючыся, што не, гэта мы проста так трэніруемся. Але мы людзі ваенныя. Калі нават трэніруемся, то, значыць, для нечага. Таму нам супакойвацца нельга. Нават калі ў нас за спінай знаходзіцца сапраўды магутная армія, як кажуць, другая армія ў свеце, вельмі магутная. Але тым не менш нам супакойвацца нельга", - сказаў кіраўнік дзяржавы.

10 снежня 2020, Мінск
БЕЛТА