Па дадзеных следства, 11 жніўня бягучага года абвінавачаны размясціў у рэгіянальным Telegram-канале шэраг паведамленняў. Мужчына апублікаваў у агульным чаце інструкцыі па ўдзеле ў групавых несанкцыянаваных мерапрыемствах на тэрыторыі Светлагорска, блакаванні аўтадарог, арганізацыі засад і нападу на супрацоўнікаў міліцыі.

Абвінавачаны рассылаў указанні ў той час, калі знаходзіўся на сваім працоўным месцы — у адным з гандлёвых цэнтраў Мазыра, дзе працаваў майстрам камп’ютарнай тэхнікі, удакладнілі ва ўпраўленні Следчага камітэта Рэспублікі Беларусь па Гомельскай вобласці.

На падставе сабраных па справе доказаў жыхару Светлагорска прад’яўленае абвінавачванне ў здзяйсненні злачынства, прадугледжанага ч. 1 арт. 342 (арганізацыя групавых дзеянняў, што груба парушаюць грамадскі парадак і звязаны з яўным непадпарадкаваннем законным патрабаванням прадстаўнікоў улады) Крымінальнага кодэкса Рэспублікі Беларусь.

Крымінальная справа перададзена пракурору для далейшага накіравання ў суд.

Наталля Капрыленка
Звязда, 11 лістапада 2020