«Усяго на фестываль былі пададзены 324 заяўкі з 16 дзяржаў. У кароткую праграму ўвайшлі 32 фільмы з 10 дзяржаў. Адзін з іх дэманструецца па-за конкурснай праграмай. Тры дні фестываль ужо актыўна адпрацаваў у Смаленску, дзе адбылося адкрыццё, шэраг круглых сталоў, прэзентацыі новых мультымедыйных праектаў і адкрытыя паказы дакументальных фільмаў, якія выклікалі жывы водгук у смаленскай аўдыторыі», — расказаў Андрэй Крывашэеў.
«Акрамя таго, прайшоў маладзёжны конкурс кароткаметражных дакументальных фільмаў „Еўразія.DOC: 4 мінуты“. Адабраны тры фіналісты, месцы паміж якімі мы размяркуем з маладзёжным журы тут, у Мінску», — дадаў ён.
Сярод хвалюючых тэм ён вылучыў тэму бяспекі, у тым ліку ў інтэрнэце, тэму чалавека ў гэтым свеце і малой радзімы. Многія фільмы расказваюць аб людзях, якія дзякуючы свайму ўнутранаму росту робяць жыццё вакол сябе значна больш камфортным і адкрытым для іншых людзей.
Дырэктар фестывалю Валерый Шахаўцоў адзначыў, што сёння таксама пройдзе круглы стол «Гарызонты новага свету. Стваральныя прынцыпы новага светаўладкавання» ў Доме Масквы, а заўтра — «Памятныя даты Вялікай Айчыннай вайны. 80 гадоў вызвалення Беларусі» ў Беларускім дзяржаўным музеі гісторыі Вялікай Айчыннай вайны.
«324 заяўкі — гэта новы рэкорд. У мінулым годзе іх было 250. Гэта дае магчымасць нам спрэсаваць большую колькасць фільмаў да кароткай праграмы. На думку ўсіх, хто бачыў конкурсныя работы, наш фестываль зрабіў яшчэ адзін крок і якасць фільмаў вырасла, а склад аўтараў памаладзеў. Нечакана, што да нас прыязджаюць маладыя дзяўчаты, студэнткі, якія здымаюць вельмі сур’ёзныя, цікавыя, якасныя фільмы», — дадаў Валерый Шахаўцоў.
Паводле яго слоў, пашыраецца геаграфія фестывалю. У гэтым годзе прысутнічаюць калегі з Ірана і Кітая. Прадстаўнікі Ірана нават правялі сустрэчу са смаленскімі студэнтамі. «Мы адчуваем, што жывы інтарэс расце з году ў год. Такое адчуванне, што ў нас ужо сфарміравалася свая аўдыторыя, і мы вельмі гэтаму рады», — падкрэсліў дырэктар фестывалю.
Дакладную праграму фільмаў можна знайсці на сайце «Еўразія.DOC». Паказы будуць праходзіць у кінатэатры «Беларусь» бясплатна. Уваход на ўсе мерапрыемствы фестывалю свабодны.
Звязда, 3 кастрычіка 2024
