Фестываль пачаў працаваць на тэрыторыі Свята-Елісавецінскага манастыра ў культурна-асветніцкім цэнтры «Каўчэг» і аб’яднаў сотні ўдзельнікаў, якія бясплатна дзеляцца з гасцямі сваёй творчасцю і ведамі. На працягу 10 дзён будуць праходзіць канцэрты, кінапаказы, выстаўкі, спектаклі, сустрэчы са святарамі, псіхолагамі, медыкамі, майстар-класы, падчас якіх можна зрабіць святочныя сувеніры.

Традыцыйна (а фестываль збірае вернікаў і наогул усіх жадаючых з 2017 года) у рамках яго працуе вялікі кірмаш, да якога далучаюцца манастыры і храмы Беларусі і замежжа. У гэтым годзе на свята прыехалі госці з Расіі, Сербіі, Палесціны, Сірыі, Грэцыі. Замежныя ўдзельнікі прывозяць з сабой не толькі тавары (абразы, кнігі, тэкстыль, святочныя сувеніры, кераміку, прадукцыю для ўмацавання здароўя), але і святыні, у тым ліку абразы, якім можна пакланіцца і папрасіць аб заступніцтве ад хвароб і нягод, а яшчэ вернікі могуць падаць запіскі, звярнуцца па параду, даведацца пра гісторыю храмаў. 

Правядзенне фестывалю прыпадае на зімовыя канікулы, таму тут падрыхтавана багатая дзіцячая праграма. Арганізатары чакаюць у «Каўчэгу» не толькі сем’і, але і групы школьнікаў. Для малых абсталяваны мяккі куток з інтэрактыўнымі гульнямі і аніматарам. Акрамя таго, асобны паверх культурна-асветніцкага цэнтра ператварыўся ў інтэрактыўную экспазіцыю «Шлях у Віфлеем», дзе ў яскравых малюнках паказаны біблейскі сюжэт аб нараджэнні Хрыста. Тут жа штодня ідуць батлеечныя спектаклі, праводзяцца пазнавальныя гульні, творчыя майстар-класы. 

У рамках фестывалю праводзяцца і дабрачынныя акцыі. Штогод фестываль дапамагае раскрыцца будучым мастакам, дызайнерам, скульптарам. Дзеці атрымліваюць заданне на стварэнне вырабу па тэматыцы Раства. У гэтым годзе гэта макеты віфлеемскіх зорак. Вынікі конкурса будуць падведзены ў апошні дзень фестывалю — 6 студзеня.