Беларускі прэзідэнт Аляксандр Лукашэнка павіншаваў народы Беларусі і Расіі з Днём яднання, паведаміла прэс-служба кіраўніка дзяржавы.

Ён адзначыў, што гэты дзень стаў знакавым як для беларусаў, так і расіян, дата стала "сімвалам сапраўднага брацтва, змацаванага сумесным гістарычным мінулым, культурнай і духоўнай супольнасцю, шматлікімі роднаснымі і сямейнымі сувязямі".

"Нас звязваюць шматгадовыя традыцыі дружбы і ўзаемавыручкі, якія ўвабралі ў сябе веліч агульных перамог, цяжар цяжкіх выпрабаванняў, горыч неймаверных страт і радасць стварэння", - гаворыцца ў віншаванні.

Як падкрэсліў Лукашэнка, зараз Беларусь і Расія сумесна будуюць будучыню і абапіраюцца пры гэтым на давер і падтрымку.

Паводле яго слоў, рэалізацыя саюзных праграм, кааперацыя ў сферах эканомікі, навукі і тэхналогій адкрываюць для гэтага партнёрства новыя гарызонты магчымасцей.

"Поспехі ў атамнай энергетыцы, касмічных даследаваннях, машынабудаванні і мікраэлектроніцы сталі важнымі ступенямі на шляху да дасягнення тэхналагічнага суверэнітэту і імпартанезалежнасці", - дадаў кіраўнік дзяржавы.

Разам з тым, паводле яго слоў, прыярытэтам інтэграцыі з’яўляецца дабрабыт людзей, а яе асновай – роўныя правы, сацыяльныя гарантыі, свабода выбару і доступ да якасных паслуг у медыцыне, адукацыі і пенсіённым забеспячэнні.

"Адзіная адукацыйная, інфармацыйная, культурная прастора дае магчымасць кожнаму грамадзяніну Беларусі і Расіі адчуваць сябе часткай вялікай цэлай – нашай агульнай Айчыны", - адзначыў прэзідэнт.

Лукашэнка мяркуе, што толькі разам беларусы і расіяне змогуць паспяхова супрацьстаяць выклікам часу.

"Вялікая Перамога, 80-годдзе якой мы будзем адзначаць зусім хутка, даказала бясспрэчную ісціну: пакуль мы разам – мы нязломныя", - дадаў беларускі лідар.

Лукашэнка пажадаў грамадзянам Беларусі і Расіі здароўя, дабрабыту, сямейнага цяпла і міру.

"Няхай нашы агульныя намаганні ўмацоўваюць адзінства, а супрацоўніцтва Беларусі і Расіі служыць залогам працвітання будучых пакаленняў", - сказаў на заканчэнне прэзідэнт.

Мінск, 2 красавіка 2025