Дарагія мае суайчыннікі!
Паважаныя госці Беларусі!
Праз некалькі хвілін 2021 год стане яшчэ адной перагорнутай старонкай у жыцці кожнага з нас, у гісторыі нашай краіны.
Гэту гісторыю пішам мы, рэалізуючы задуманае, ажыццяўляючы мары, нараджаючы дзяцей і ствараючы сем’і. І я гавару дзякуй усім, хто пражыў кожны дзень адыходзячага года з любоўю да людзей і роднай зямлі, павагай да памяці свайго народа і нацыянальных традыцый.
Вам — сялянам і рабочым, урачам і настаўнікам, людзям у пагонах, навукоўцам і дзеячам культуры, журналістам і спартсменам, кіраўнікам і працоўным калектывам.
Менавіта так — карпатліва, дзень за днём — вось ужо 30 гадоў будуецца і квітнее наша суверэнная дзяржава. І згадзіцеся, азіраючыся ў пачатак 90-х, нам ёсць чым ганарыцца. Мы пабудавалі сучасную, стабільную і паспяховую краіну. Насуперак выклікам часу ўпэўнена ставім новыя мэты і ідзём наперад.
Спакойна, без мітусні вырошчваем хлеб, вучым дзяцей, змагаемся за здароўе нацыі, ствараем утульнасць і камфорт у гарадах і вёсках, укараняем у вытворчасць сучасныя тэхналогіі і праектуем аб’екты будучыні.
І мы нямала за гэты год зрабілі: пабудавалі новыя дамы, дарогі, масты, камфартабельныя жылыя мікрараёны, адкрылі школы, дзіцячыя сады, бальніцы, паліклінікі, падарылі краіне яркія творчыя праекты і спартыўныя перамогі.
Усё гэта — вынік вашай працы, вашай самааддачы. І адказ тым, хто не хоча бачыць на карце свету нашу маладую незалежную дзяржаву.
Але яна будзе! Яшчэ і таму, што на беларускай зямлі і сёння нараджаюцца мужныя людзі, гатовыя працаваць, змагацца, а калі патрэбна — аддаць жыццё за сваю краіну, за свой народ.
Мы заўсёды будзем удзячныя нашым урачам за выратаванне маленькага беларуса, які вынес з агню брата.
Болем і гонарам будуць адгукацца ў нашых сэрцах імёны ваенных лётчыкаў, якія пайшлі ў свой апошні палёт.
Мы будзем выхоўваць сыноў на памяці байца групы «Альфа», які з гонарам выканаў сваё апошняе заданне.
Усе яны — равеснікі нашай незалежнасці, моцныя, смелыя, любячыя сваю Радзіму, сапраўдныя героі сучаснай Беларусі.
Яны сталі ў адзін рад з пакаленнем пераможцаў Вялікай Айчыннай вайны. Пакінулі ў гісторыі свой дастойны прыклад сапраўднага патрыятызму і велічы душы.
Я таксама ганаруся ўсімі, хто праявіў у гэтым годзе такія рэдкія ў наш жорсткі век чалавечнасць, міласэрнасць і сапраўдны гуманізм да людзей, якія страцілі сваю Радзіму і вымушаны шукаць новае прыстанішча.
Мы гэта зрабілі таму, што добра разумеем вялікую каштоўнасць міру, дому і хлеба. Каштоўнасць таго, за што самі змагаліся ў сваёй гісторыі не раз.
Беларусь помніць урокі мінулага. Таму ў адыходзячым годзе мы разам адрадзілі традыцыю адзначаць дату ўз’яднання беларускіх зямель. Дзень народнага адзінства стаў дзяржаўным святам — адным з сімвалаў станаўлення беларускай нацыянальнай дзяржавы.
Гэта наша зямля, гэта наш лёс, гэта наша гісторыя. І толькі мы будзем яе вяршыць. Гэтага не змяніць, пакуль у кожным з нас гарыць незгасальнае полымя любові да Радзімы.
Ставячы перад сабой новыя мэты, мы ведаем, што не ў нашых сілах усё прадугадаць, але нам падуладна ў надыходзячым годзе вызначыць для сябе галоўнае.
Гэта тое, што павінна быць у памяці пакаленняў і ў сэрцы кожнага. Гэта нашы рэальныя вытокі — тая жыватворная сіла, якая стагоддзямі жывіла і фарміравала наш духоўны і маральны свет. У ёй і сёння мы чэрпаем мудрасць, вопыт і веру ў сябе.
Паколькі без павагі да мінулага, без традыцый няма будучыні, няма дзяржавы і няма народа.
Дарагія беларусы!
Ад новага, 2022 года нас аддзяляюць лічаныя секунды. Яны нясуць нас у будучыню з велізарнай хуткасцю.
Кожны цяпер успамінае самыя эмацыянальныя імгненні адыходзячага 2021 года. Мы ўдзячныя яму за ўсё добрае, што з намі адбылося, за вопыт, які набылі, за любімых, родных і блізкіх, якія былі апорай у цяжкія, радасныя і шчаслівыя дні.
Гэта і ёсць самае бясцэннае багацце, залог таго, што ўсё задуманае намі, нашы лепшыя чаканні і надзеі здзейсняцца, а Беларусь стане яшчэ прыгажэй і багацей.
Галоўнае — каб усе былі здаровыя, на нашай зямлі быў мір, а ў вашых сем’ях панавалі згода, шчасце і любоў.
Віншую вас са святам! З новым, 2022 годам!
Звязда, 1 студзеня 2022
