«„Зоркі сёмага неба“ — гэта фільм-прыпавесць, у фантазійна-музычнай форме распавядае пра сілу мары, пра тое, як важна не здавацца, імкнучыся да высакароднай мэты, аб барацьбе са спакусамі, якія паўстаюць на шляху да яе дасягнення. Сюжэт казкі просты: шэсць монстраў закрываюць усе зоркі, называючы зоркамі сябе. Людзі перастаюць глядзець на неба і марыць, з-за чаго з часам становяцца злымі і жорсткімі. Выратаваць планету могуць толькі летуценнікі, так збіраецца каманда з хлопчыка Сашы, ката Мурмота і дзяўчынкі Элі, якім трэба будзе адправіцца ў падарожжа і справіцца з усімі каварнымі монстрамі», — адзначылі на кінастудыі.

Над мультфільмам працавалі пяць гадоў, у яго аснове — аднайменная кніга Генадзя Давыдзькі. Рэжысёрам выступіла Алена Турава, мастаком-пастаноўшчыкам — Святлана Кавалеўская. Спецыяльна для анімацыйнага фільма кампазітарам Леанідам Шырыным было напісана звыш 40 песень, а музыкі ў цэлым — яшчэ больш. Галоўныя ролі агучылі вядомыя беларускія артысты і тэлевядучыя.

«На палях прэм’ернага паказу ў 10.30 адбудзецца брыфінг творчай групы мультфільма з прэсай. Стваральнікі анімацыйнага фільма прадставяць праект і пагутараць з гледачамі. Паказ „Зорак сёмага неба“ пачнецца ў 11.00», — распавялі ў прэс-службе.

Акрамя таго, 1 чэрвеня мультфільм прадэманструюць у 10.30 у кінатэатры «Беларусь» у Мінску. Паказ прымеркаваны да Дня абароны дзяцей.

Звязда, 29 траўня 2021