Сёння адзначаецца Дзень пацалунку. Якія яшчэ падзеі адбыліся 6 ліпеня і чым адзначаны гэты дзень у народным календары, чытайце далей:
Гістарычныя падзеі 6 ліпеня
У 1253 годзе ў дзень св. Пятра і Паўла адбылася каранацыя Міндоўга.
У 1989 годзе была адноўлена Полацкая епархія.
Хто нарадзіўся 6 ліпеня
1851: Янка Лучына, беларускі паэт.
1905: Пятро Глебка, беларускі грамадскі дзеяч, навуковец, паэт, драматург, перакладчык.
Таксама сёння нарадзіліся англійскі мастак Джон Флаксман і амерыканскі акцёр Сільвестар Сталоне.
6 ліпеня ў народным календары
Сёння праваслаўныя вернікі шануюць памяць святой Агрыпіны, якую празвалі Купальніцай, у народным календары гэты дзень супадаў са святкаваннем Купалля, яно адзначалася ў некаторых мясцовасцях Беларусі ў ноч з 6 на 7 ліпеня.
На Купалле збіралі гаючыя зёлкі, варажылі на вянках і скакалі праз вогнішча, каб ачысціцца ад усяго дрэннага, што здарылася за год. Ноччу хадзілі ў лес шукаць папараць-кветку – магічную расліну, якая нібыта квітнее ўсяго некалькі секунд у купальскую ноч, але можа прынесці свайму уладару багацце і нават магчымасць разумець звяроў і птушак. На досвітку 7 ліпеня дзяўчыны ўмываліся расой, каб захаваць сваю прыгажосць.
Шмат расы ў гэты дзень, дарэчы, прадвяшчала добры ўраджай агуркоў. Калі чуваць конікаў, дзень будзе спякотны, а вось моцны пах палявых кветак сведчыць пра тое, што збіраецца дождж.
Sputnik, 6 ліпеня 2024
