Самай папулярнай у 2019 годзе стала кніга, прысвечаная Правілам дарожнага руху і мерам адказнасці за іх парушэнні (выдавец — Рэгіянальны цэнтр прававой інфармацыі Мінска) — яе за восем месяцаў набылі ў колькасці 2969 (!) асобнікаў.

Дарэчы, на другім і трэцім месцах таксама ў лідарах — кнігі аб правілах дарожнага руху. Толькі ўжо іншыя выданні.

На чацвёртым і пятым месцах — казкі «Два сквапныя медзведзяняці» і «Як звяры суп варылі» (адпаведна 576 і 557 асобнікаў набылі сёлета пакупнікі кіёскаў, павільёнаў у горадзе Мінску). Выдавец казак — «Харвест».

З дзяржаўных выдаўцоў у сотню лепшых па рэйтынгу найпродажаў трапіла ўсяго толькі сем пазіцый Паліграфічнага камбіната імя Якуба Коласа. Размова, зразумела, пра выданні казак. Верхняе месца ў «коласаўцаў» — 38-е (247 асобнікаў «Вячэрніх казак»), ніжняе — 63-е (прададзена 183 асобнікі «Дзядулевых казак»).

На жаль, у рэйтынгу са 100 назваў кніг не знайшлося месца кнігам сучасных беларускіх пісьменнікаў, ды і кнігам беларускіх класікаў — таксама.

Гэта не значыць, што кнігі беларускіх выдавецтваў у «Белсаюздруку» не купляюць зусім. Рэйтынг складзены ў дачыненні да 100 кніг, якія найболей прадаюцца. Ніжнюю пазіцыю ў ім займае кніга, прададзеная ў колькасці 85 асобнікаў.

А калі гаварыць аб працэнтных суадносінах па аб`ёме агульных продажаў (гэта значыць — з улікам і тых назваў кніг, якіх прадалі меней, чым 85 экзэмпляраў), то ў дзясятку найболей руплівых распаўсюджвальнікаў кніг у «Белсаюздруку» ўвайшло і выдавецтва «Беларусь» (восьмае месца: 3,2 працэнта ў агульных продажах). На 12-м месцы — «Беларуская Энцыклапедыя імя Петруся Броўкі», на 13-м — Паліграфічны камбінат імя Якуба Коласа, на 16-м — Выдавецкі дом «Звязда», на 17-м — «Пачатковая школа».

Лічбы, як кажуць, заўсёды красамоўныя. А высновы, пэўна, варта рабіць выдаўцам. Калі, вядома, яны дбаюць пра чытача, пакупніка кнігі.