Адкрыў 4 сакавіка Дні кыргызскага кіно фільм "Чырвоны яблык" рэжысёра Таламуша Акеева, зняты паводле апавядання Чынгіза Айтматава. Стужка расказвае пра юнака Тэміра, які ў юнацтве сустрэў дзяўчыну незвычайнай прыгажосці, але любіў яе на адлегласці, употай, сустракаючы і ідучы за каханай у патоку прахожых. Спрабуючы падарыць незнаёмцы сімвал сваёй мары пра шчасце - чырвоны яблык, герой натыкаецца на неразуменне і нават варожасць. Праз некалькі гадоў пасля перажытага Тэмір пачынае нармальнае жыццё - заводзіць сям`ю, хатнюю гаспадарку, падумвае пра дзяцей. Але ўспамін пра нераздзеленае каханне не пакідае яго.

Далей, 5 сакавіка, адбудзецца паказ карціны "Кентаўр" (рэжысёр - Актан Арым Кубат), што расказвае пра пошук Бога, а таксама пра чалавека, які адчайна змагаецца за захаванне традыцый свайго народа. Гэта сага аб метафізічнай сувязі паміж канём і чалавекам, у выніку якой конь становіцца крыламі чалавека.

Завершацца дні кыргызскага кіно 6 сакавіка стужкай "Начная аварыя" Тэміра Бірназарава. Фільм зняты па матывах твораў Таліпа Ібраімава. Ён уяўляе мінімалісцкі, але паэтычны расказ пра старога, які зноў набывае сэнс жыцця пасля таго, як аднойчы ўначы, праязджаючы па сельскай дарозе на матацыкле з каляскай, ён наткнуўся на параненую незнаёмую дзяўчыну.

Усе паказы праходзяць у сталічным кінатэатры "Беларусь", уваход свабодны.

Арганізатарам Дзён кіно выступае пасольства Кыргызстана ў Беларусі пры падтрымцы Міністэрства культуры.

5 сакавіка 2019, Мінск
БЕЛТА