«Перадусім, на тое мы й Хрысьціяне, ведаючы ўсе навукі быцьця, якое мінае, патрабуем рэчы вечнае — Духоўнага збаўленьня.» (Францішак Скарына, прадмова да ўсяе Бібліі, 1517г.)
Любыя браты і сёстры ў Хрысьце!
Ізноў мы сьвяткуем Нараджэньне Хрыстовае — сьвята прыходу ў чалавечым целе на Зямлю Сына Божага, другое асобы Прасьвятое Тройцы. За дзьве тысячы гадоў, якія мінулі ад гэтае гістарычнае падзеі, чалавецтва матэрыяльна вельмі разьвілася ў навуцы, тэхніцы й дабрабыце, але духоўныя праблемы засталіся — нянавісьць, войны, захоп чужых земляў... Гэта значыць, што навука Ісуса Хрыста і шлях, які Ён паказаў людзям, ёсьць сёньня і будуць заўсёды вельмі актуальныя для ўсіх нас. Таму кожны год сустракаем Каляды ўрачыста й радасна, з надзеяй на перамогу Хрыстовае любові, якую Ён прынёс людзям, каб яны дасягнулі Ўладарства Божага, якое Ён прапаведваў.
Беларускі народ, які далучыўся да Хрысьціянства болей за тысячу гадоў таму, а пяцьсот год таму выдаў Біблію на роднай мове, на працягу свае вялікае гісторыі ня толькі пабожна цярпеў нягоды у часы акупацыі заходнімі ці ўсходнімі суседзямі, але й заўсёды жыў праўдзіва, змагаючыся за сваю тоеснасьць. А сіла і сьвятасьць — у праўдзе. Таму з Божаю дапамогаю народ выстаяў, захаваўшы свой край і аднавіўшы сваю дзяржаву.
Цяпер таксама адчуваем небясьпеку дзяржаўнасьці Беларусі ад бязбожнага ўсходняга суседа, таму асабліва за змагароў за яе волю й незалежнасьць моліцца Беларуская Царква, таксама — за ўсіх беларусаў, якія жывуць на Бацькаўшчыне і ў замежжы, просячы ў Госпада міру сваім суайчыньнікам у новым 2017 годзе, каб захоўваў нашу Бацькаўшчыну ад нашэсьця чужынцаў.
Няхай жа Бэтлеемская Зорка зьзяе на Калядных ялінках у кожнай хатцы ў гэтыя сьвяточныя дні, а ў сэрцах і душах кожнага чалавека — няспынна на працягу ўсяго ягонага жыцьця.
Хрыстос нарадзіўся! Слаўце Яго!
Зь любасьцю й малітвамі,
+ Сьвятаслаў Логін,
Архіяпіскап Наваградзкі, Першагерарх
Беларускае Аўтакефальнае Праваслаўнае Царквы.
