У найбліжэйшую нядзелю праваслаўныя хрысціяне адзначаць Уваскрасенне Хрыстова. Урачыстыя набажэнствы, прымеркаваныя да свята, адбудуцца 14 і 15 красавіка ў 36 праваслаўных храмах і прыходах сталіцы.
Як паведамілі ў ГУУС Мінгарвыканкама, пры правядзенні рэлігійных мерапрыемстваў чакаецца вялікая колькасць грамадзян як у саміх культавых будынках, так і на сумежнай тэрыторыі. У сувязі з гэтым намаганні сталічных міліцыянераў будуць скіраваны на арганізацыю асабістай і маёмаснай бяспекі грамадзян, а таксама на папярэджанне ДТЗ у месцах правядзення мерапрыемстваў і на сумежнай вулічна-дарожнай сетцы. Шчыльнасць міліцэйскіх нарадаў будзе павялічана. Праваахоўнікі будуць выкарыстоўваць ручныя металадэтэктары, а пры неабходнасці будуць гатовы выставіць агароджы і арганізаваць прапускны рэжым з выкарыстаннем стацыянарных (рамачных) металадэтэктараў.
Традыцыйна ў святочныя дні ГУУС заклікае гараджан і гасцей сталіцы да ўмеранасці ва ўжыванні спіртнога, а таксама нагадвае пра забарону распівання алкагольных напояў, у тым ліку піва, у грамадскіх месцах.
Вячаслаў Будкевіч,
БелаПАНМінск, 13 красавіка 2012
