Сярод іх фестывалі, творчыя конкурсы, памятныя мерапрыемствы, святы-конкурсы. "Упершыню ў бягучым годзе пройдзе абласное свята народнай творчасці "Слуцкія паясы", на якім будуць прадстаўлены многія віды народных промыслаў", - расказала Святлана Баранок.

Пачнецца фестывальны год з ХІІІ свята класічнай музыкі "Заслаўе-2013", які праводзіць Нацыянальны акадэмічны канцэртны аркестр пад кіраўніцтвам народнага артыста Беларусі, лаўрэата Дзяржаўнай прэміі Беларусі і прэміі Саюзнай дзяржавы ў галіне літаратуры і мастацтва прафесара Міхаіла Фінберга.

У першым паўгоддзі ў мінскім рэгіёне пройдуць XV адкрыты абласны конкурс выканаўцаў на духавых і ўдарных інструментах імя Івана Янкоўскага "Залатая труба", ХVІІІ свята мастацтваў "Музы Нясвіжа", ІX абласны фестываль дзіцячай тэатральнай творчасці "Чароўны куфэрак", абласныя конкурсы харэаграфічнага мастацтва "Харэограф і Я" і харавых калектываў дзіцячых школ мастацтваў і інш. Пройдуць таксама памятныя мерапрыемствы, прысвечаныя 70-годдзю з дня трагедыі ў вёсцы Хатынь, у тым ліку міжнародная навукова-практычная канферэнцыя.

Адным з найбольш значных фестываляў Святлана Баранок назвала фестываль народнай творчасці "Напеў зямлі маёй", які праводзіцца штогод з 2001 года. У 2013 годзе ён будзе прысвечаны 75-гадоваму юбілею з дня нараджэння кампазітара, старшыні Беларускага саюза кампазітараў Ігара Лучанка. Фестываль аб`ядноўвае ў сабе ўсю жанравую палітру народнага мастацтва. Дзякуючы падтрымцы Мінаблвыканкама акрамя спецыяльных дыпломаў лаўрэаты і дыпламанты абласнога свята атрымліваюць каштоўныя падарункі. Уладальнікам галоўнага прыза становіцца аддзел культуры, калектыў якога прадэманструе самы высокі ўзровень выканальніцкага майстэрства. Адбудзецца фестываль 12 кастрычніка ў Мар`інай Горцы.

Яшчэ адным буйным мерапрыемствам стане X абласны фестываль нацыянальных культур, які пройдзе 5 снежня ў Маладзечне. У гэты дзень прадстаўнікі розных нацыянальнасцей збяруцца разам, каб пазнаёміць гасцей і жыхароў Маладзечна з нацыянальнымі традыцыямі, культурай, кухняй і мастацтвам. Фестываль стаў традыцыйным для Мінскай вобласці: ён праходзіць раз у два гады.

Як паведамілі ў фінансавым упраўленні Мінскага аблвыканкама, на фінансаванне ўстаноў культуры ў 2013 годзе плануецца накіраваць Br427 млрд., што ў 1,25 раза вышэй за ўзровень 2012 года. Гэтыя сродкі дадуць магчымасць забяспечыць не толькі функцыянаванне ўстаноў культуры, але і правядзенне цэнтралізаваных мерапрыемстваў, у тым ліку штогадовых фестываляў, конкурсаў. Будзе таксама аказана падтрымка дзяржаўным тэатральна-відовішчным арганізацыям.

На рэалізацыю мерапрыемстваў, уключаных у дзяржаўныя праграмы, з бюджэту Мінскай вобласці будзе накіравана Br7,45 млрд., у тым ліку на мерапрыемствы Дзяржпраграмы "Культура Беларусі" на 2011-2015 гады - Br5,8 млрд., развіцця курортнай зоны Нарачанскага рэгіёну на 2011-2015 гады - Br0,19 млрд., адраджэння тэхналогіі вытворчасці слуцкіх паясоў і развіцця нацыянальнай сувенірнай прадукцыі "Слуцкія паясы" на 2012-2015 гады - Br1,1 млрд.

5 студзеня 2013, Мінск
Вера Грамчакова - БЕЛТА