У музыканткі англійскае грамадзянства і пячатка Сінгапура ў пасведчанні аб нараджэнні. Яна нарадзілася ў адзін дзень з італьянскім скрыпачом і кампазітарам Нікола Паганіні, праўда, на 200 гадоў пазней.

Стыль Ванесы-Мэй — гэта сплаў культур і эпох. Кітаянка па маці, тайка па бацьку, Ванеса праславілася дарам спалучаць гук акустычнай і электрычнай скрыпкі з рытмамі джаза і тэхна. "Скрыпка не павінна застацца ў мінулым. Яна павінна ўвайсці разам з намі ў новае стагоддзе. Я стараюся зрабіць для электраскрыпкі тое, што ў свой час зрабіў Джымі Хендрыкс для электрагітары", — кажа Ванеса-Мэй.

Яна маўклівая, смелая, прыгожая і адданая сваёй чароўнай скрыпцы. Гэта інструмент працы Гваданьіні, вучня Страдывары, створаны ў 1761 годзе і куплены на аўкцыёне за 150.000 фунтаў стэрлінгаў. Акрамя гэтага акустычнага інструмента артыстка выкарыстоўвае электраскрыпкі Zeta Jazz Model і Ted Brewer Violins.

17-га лютага ў Мінску яна выканае скрыпічныя шэдэўры нямецкіх кампазітараў Баха, Брамса, Бетховена і Бруха.

БелаПАН, 17 лютага 2013