14-га снежня ў вялікай зале Музея сучаснага выяўленчага мастацтва ў Мінску адбылася сустрэча з Томашам Тамашэўскім, вядомым польскім фатографам, аўтарам выставы "Гарантуецца атмасфера добразычлівасці. Падляшша", якая адкрылася напярэдадні.
На выставе, арганізаванай Падляшскім ваяводствам Польшчы праз Польскі інстытут у Мінску, дэманструецца серыя фатаграфій, прысвечаная побыту, працы і рэлігійна-абрадавым аспектам жыцця насельніцтва Падляшша, сярод якога, як вядома, значную колькасць складаюць беларусы.
Томаш Тамашэўскі — сябра Польскага саюза мастакоў-фотаграфікаў, агенцтва Visum Archiv у Гамбургу, агенцтва Image Collection у Вашынгтоне, а таксама Амерыканскага таварыства фатографаў для часопісаў. Займаецца фатаграфіяй для прэсы, публікуе свае працы як у папулярных польскіх часопісах, так і ў найбуйнейшых замежных.
Аўтар некалькі кніг, таксама ілюстраваў сваімі здымкамі больш за дзясятак альбомаў розных аўтараў. Яго шматлікія персанальныя выставы праходзілі па ўсім свеце. Лаўрэат польскіх і міжнародных фатаграфічных узнагарод. Выкладае фатаграфію ў Польшчы, ЗША, Германіі і Італіі.
БелаПАН, 14 снежня 2012
