Замак Радзівілаў у Нясвіжы не быў абарончым. На працягу чатырох стагоддзяў ён быў сховішчам культурных каштоўнасцяў, быў "фарпостам еўрапейскай культуры сярод гушчараў і балот".
Пра гэта нагадаў 24 чэрвеня дырэктар Нацыянальнага гісторыка-культурнага музея-запаведніка "Нясвіж" Сяргей Клімаў на прэс-канферэнцыі, прысвечанай адкрыццю летняга фестывалю опернага і балетнага мастацтва "Вечары Вялікага тэатра ў замку Радзівілаў". Фестываль праходзіць у Нясвіжы з 24 па 26 чэрвеня.
Паводле слоў дырэктара музея-запаведніка, правядзенне фестывалю дазваляе вярнуць замку яго першапачатковую функцыю, таму супрацоўніцтва будзе прадоўжана. "Мы і далей будзем развіваць адносіны і з оперным тэатрам, і з тэатрам драматычным", — сказаў Сяргей Клімаў.
У Тэатральнай зале замка цяпер завяршаюцца рэстаўрацыйныя работы. "Гэта тая зала, якую Пане Каханку спецыяльна надбудаваў для прыёму польскага караля Станіслава Аўгуста Панятоўскага ў канцы XVIII стагоддзя, там, паводле архіўных дакументаў, быў тэатр", — расказаў Клімаў.
Акрамя таго, у замку адноўлена бальная зала, якая падыходзіць для камерных канцэртаў. У перспектыве тут можна праводзіць міжнародныя музычныя фестывалі, перакананы дырэктар музея-запаведніка.
Такое насычанае культурнае жыццё павінна прыцягнуць у музей турыстаў. Бо "проста экспанаты пад шклом, бабуля-наглядчык — гэта нецікава, такія музеі састарэлі яшчэ сто гадоў таму", падкрэсліў Сяргей Клімаў.
БелаПАН25 чэрвеня 2011
