Бабруйскі гарвыканкам заснаваў прэмію за папулярызацыю беларускай мовы. Узнагарода будзе насіць імя пісьменніка Міхася Лынькова, які некалькі гадоў працаваў у Бабруйску галоўным рэдактарам гарадской газеты.
Будзе гэта песня, літаратура ці журналістыка, вырашыць адмысловая камісія, паведамляюць у Бабруйскім гарвыканкаме. Адзіная ўмова – прэтэндаваць на узнагароду змогуць толькі жыхары гораду.
Старшыня Таварыства беларускай мовы імя Ф. Скарыны Алег Трусаў адзначае, што падобныя з’явы ў апошнія два гады амаль ператварыліся ў тэндэнцыю:
- З Магілёўскай, Гомельскай абласцей, з Аршаншчыны прыходзяць весткі аб тым, што чыноўнікі пачалі звяртаць увагу на родную мову, - сказаў Трусаў у інтэрв`ю тэлеканалу "Белсат".
Алег Трусаў звязвае гэта з тым, што цяпер адбываецца змена пакаленняў, сталеюць тыя, хто памятае часы беларускага Адраджэння, магчыма, сам браў удзел у акцыях адстойвання незалежнасці Беларусі. Да таго ж, адзначае Алег Трусаў, сярод чыноўнікаў расце разуменне, што без роднай мовы Беларусь страціць сваю незалежнасць і зробіцца прыдаткам Расеі.
МЫ
23 студзеня 2011
