28 кастрычніка 2010 г. Пінская дыяцэзія адзначыла 85-годдзе свайго заснавання. У пінскім катэдральным касцёле Унебаўзяцця Найсвяцейшай Панны Марыі а 11-й гадзіне біскуп Гродзенскі Аляксандр Кашкевіч, старшыня Канферэнцыі Каталіцкіх Біскупаў Беларусі, узначаліў святую Імшу.
У гаміліі біскуп Кашкевіч закрануў гісторыю заснавання Пінскай дыяцэзіі і семінарыі. Іерарх нагадаў, што пасля першых гадоў дзейнасці для Пінскай дыяцэзіі настаў час пераследаў, «аднак Касцёл вытрываў, дзякуючы гераічным намаганням святароў і вернікаў», бо Хрыстус мае ўладу выводзіць Касцёл з кожнай складанай сітуацыі. Іерах прыгадаў таксама асобу першага біскупа Пінскай дыяцэзіі Слугі Божага Зыгмунта Лазінскага, а таксама кардынала Казіміра Свёнтка.
Пасля святой Імшы ў памяшканнях курыі адбылося адкрыццё выстаўкі, прысвечанай благаслаўлёнаму кс. Мечыславу Багаткевічу. Пасля ў будынку Міждыяцэзіяльнай вышэйшай духоўнай семінарыі былі зачытаны даклады і прадэманстраваны дакументальны фільм пра постаць Слугі Божага біскупа Зыгмунта Лазінскага.
Кірыл Бардонаў
Католік.by 28 кастрычніка 2010
