«Рыхтавалі ў некалькі этапаў, тыдзень на стварэнне сышоў. Усе работнікі булачнага цэха прымалі ўдзел. Зроблены ён з здобнага цеста і вельмі смачны», — распавядае начальнік булачнага цэха ААТ «Гроднахлебпрам» Святлана Пацехіна. Яна дадала, што ўсе ўпрыгажэнні зроблены ўручную. «Каравай сімвалізуе нашу сінявокую Беларусь. Мы хацелі паказаць, што наша Радзіма багата рознымі гістарычнымі аб’ектамі і прыгожай прыродай», — адзначыла Святлана Пацехіна.
Важкай атрымалася і кампазіцыя майстроў з Брэста. Адзін з уражлівых аб’ектаў, які яны прывезлі ў Свіслач, — Косаўскі замак.
«Косаўскі замак — гэта адна з нашых галоўных славутасцяў. Ля замка 12 вежаў, кожная сімвалізуе месяц года, чатыры з іх — самыя багатыя, хлебныя, ураджайныя месяцы. Зроблена кампазіцыя наша з дражджавога цеста. Гэта задума галоўнага пекара Антаніны Касавец. Разам з каркасам наш хлебны замак завесіў 50 кг», — распавяла прадстаўніца Івацэвіцкага камбіната кааператыўнай прамысловасці Вольга Шыбайко.
Звярнуліся да гістарычнай спадчыны і майстры са Смаргоні.
«Наша зямля — радзіма знакамітага Міхала Клеафаса Агінскага. Гэтым і натхнілася. Пано створана з салёнага цеста, спатрэбілася два тыдні, усё ўручную ляпіла», — распавяла качагар вытворчых печаў Смаргонскага хлебазавода ААТ" Гроднахлебпрам" Валянціна Пашкевіч.
У пекары па слядах маці пайшоў Яўген Гараўскі. Яго рукам належыць макет Гродзенскага драмтэатра.
«Ён зроблены з пластовага цеста, даўно марыў зрабіць менавіта драмтэатр, вось і атрымалася ўвасобіць сваю мару да фестывалю. Усё зрабіў сам, калега дапамагла зрабіць толькі скульптуру», — распавёў фармоўшчык цесту чацвёртага разраду ААТ «Гроднахлебпрам».
А сакрэт удалага каравая жыхаркі Свіслачы Галіны Алюшкевіч у спрыяльнай атмасферы падчас гатавання.
«Галоўнае — печ ад душы, у добрым настроі, спяваць добрыя песні», — распавяла жанчына.
У рамках каравай-фэсту прайшла эстафета «Бацькава міля», а таксама экскурсійны майстар-клас. На цырымоніі адкрыцця з маленькіх булачак сабралі карту Беларусі. Для гасцей першага ў Беларусі каравай-фэсту арганізавана і музычная праграма. Акрамя калектываў з Гродзенскай і Брэсцкай абласцей выступае група «Дразды».
Звязда, 20 жніўня 2022
