Прэзідэнт Беларусі Аляксандр Лукашэнка падпісаў указ, якім прадугледжваецца дадатковая адказнасць наймальнікаў пры працаўладкаванні замежных работнікаў, паведамілі ў прэс-службе кіраўніка дзяржавы.
"Для ўзмацнення патрабаванняў да прыцягнення замежнай рабочай сілы, за выключэннем грамадзян дзяржаў – членаў ЕАЭС, на наймальнікаў ускладзены дадатковыя абавязкі", – гаворыцца ў паведамленні.
Цяпер наймальніку давядзецца наведваць мігрантаў дома і сачыць за ўмовамі іх пражывання. Калі будуць выяўлены якія-небудзь парушэнні, ён будзе абавязаны паведаміць аб іх у кампетэнтныя дзяржорганы і пры неабходнасці прыняць меры.
Таксама працадаўца павінен будзе абавязкова арганізоўваць для сваіх замежных работнікаў тэставанне на веданне рускай або беларускай мовы.
Згодна з дакументам, заключаць працоўную дамову з такімі супрацоўнікамі трэба будзе ў 30-дзённы тэрмін з даты ўезду ў Беларусь. Пры гэтым будзе забаронена часова пераводзіць іх да іншага наймальніка, каб пазбегнуць выкарыстання працы без гэтай працэдуры.
"Наймальнікі таксама будуць абавязаны арганізоўваць кантроль за дзейнасцю і ўмовамі знаходжання мігрантаў, уключаючы вызначэнне асоб, адказных за такі кантроль", – сказалі ў прэс-службе.
Калі наймальнік не будзе выконваць замацаваныя за ім абавязкі, яго прыцягнуць да адміністрацыйнай адказнасці, а працоўныя дамовы з мігрантамі будуць датэрмінова скасаваны, і ім давядзецца пакінуць краіну.
