Такім чынам, можна лічыць вырашаным пытанне прыпынення працы магазінаў, звязанага з неадпаведнасцю патрабаванням указа прэзідэнта № 567 "Аб дадатковых мерах па абароне правоў спажыўцоў" ад 5 снежня. 

Як паведамілі ў кампаніі "Мегатоп", яна выканала патрабаванні Міністэрства гандлю і асартымент магазінаў папоўніўся новымі таварамі беларускай вытворчасці. Пры гэтым падкрэсліваецца, што, "нягледзячы на ўсе перыпетыі, звязаныя з часовым закрыццём магазінаў, а таксама змяненнямі ў эканоміцы краіны", кампанія пакінула цэны на ранейшым узроўні, замарозіўшы іх. 

У адпаведнасці з указам кампанія "Мегатоп" аператыўна заключыла дагаворы з шэрагам беларускіх вытворцаў абутку, што дазволіла прадставіць у гандлёвай сетцы ўсе тавары, пералічаныя ў асартыментным пераліку, дададзеным да ўказа прэзідэнта. Зараз у магазінах "Мегатоп" асноўны асартымент уласнай вытворчасці і ўласных гандлёвых марак дапоўнены прадукцыяй такіх вытворцаў, як ААТ "Гродзенская абутковая фабрыка "Нёман", ЗАТ "Сівельга", ААТ "Абутак", СЗАТ "ОТЫКА" і Мінскае абутковае ААТ "Прамень". 

Пры гэтым кампанія паведамляе, што разглядае гэтую меру як часовую. 

Адзначаецца, што "Мегатоп" мае сваю ўласную вытворчасць у Віцебску. Цяпер там выпускаецца жаночы абутак пад гандлёвай маркай Happy Family. У рознічным тавараабароце прадукцыя гэтай маркі дасягае 15%. "Улічваючы новыя рэаліі", кампанія плануе найбліжэйшым часам пашырыць свае вытворчыя магутнасці і наладзіць выпуск мужчынскага і дзіцячага абутку.

Аляксей Арэшка, БелаПАН
Мінск, 24 снежня 2014