Супрацоўнікамі аператыўна-пошукавага аддзела Мінскай цэнтральнай мытні сумесна з работнікамі Дзяржаўнага пагранічнага камітэта, міліцыі і падатковых органаў канфіскавана буйная партыя дарагіх тэлевізараў замежнай вытворчасці.
Як паведамляе прэс-служба Дзяржаўнага мытнага камітэта, падчас правядзення спецыяльнага мерапрыемства супрацоўнікамі праваахоўных ведамстваў на складзе, што належыць індывідуальнаму прадпрымальніку, які ажыццяўляе гандаль праз інтэрнэт-магазіны, былі выяўлены 260 тэлевізараў з ВК- і плазменнымі экранамі фірм LG, Philips, Samsung.
Паводле звестак ДМК, дакументы, што пацвярджаюць легальнасць увозу гэтай партыі тавару і выплату мытных плацяжоў і падаткаў, прадпрымальнік паказаць не змог. Разам з тым аператыўнікі знайшлі паперы, якія сведчаць пра тое, што тэлевізары былі ўвезены ў Беларусь з Польшчы.
Па факце выяўленага правапарушэння праводзяцца праверачныя мерапрыемствы. Увесь тавар папярэднім коштам звыш 1,5 млрд. рублёў канфіскаваны супрацоўнікамі мытні.
Аляксей Арэшка,
БелаПАНМінск, 2 лістапада 2012
