РГУП "Беларускае рачное параходства" ў першым паўгоддзі 2012 года перавезла 79,9 тысячы пасажыраў, паведаміла прэс-служба Міністэрства транспарту і камунікацый.
Перавозка пасажыраў ажыццяўляецца суднамі Беларускага рачнога параходства як у абласных цэнтрах (Гомель, Магілёў, Брэст), так і ў раённых (Мазыр, Рэчыца і Пінск) і на Мінскім моры паблізу сталіцы.
У прыватнасці, рачны порт Гомель ажыццяўляе перавозку трыма пасажырскімі цеплаходамі на экскурсійнай лініі па рацэ Сож і на папярэднюю замову. Дадаткова, па суботах і нядзелях, цеплаход курсіруе па маршруце Гомель — Крысін. Таксама ў перыяд навігацыі цеплаход, які базуецца ў Лоеве, перавозіць пасажыраў па маршруце Лоеў — Карпаўка і ажыццяўляе экскурсійныя прагулкі ў раёне Лоева.
Рачны порт Брэст таксама мае тры пасажырскія судны. Адзін з цеплаходаў перавозіць пасажыраў па экскурсійным маршруце па рацэ Мухавец у межах Брэста, два іншыя знаходзяцца на ўчастку "Мінскае мора" і ажыццяўляюць рэйсы па Заслаўскім вадасховішчы.
Рачны порт Магілёў прапануе жыхарам і гасцям горада на выбар хуткасны цеплаход і больш умяшчальную, але менш хуткасную плаўверанду. Судны працуюць паводле папярэдняй замовы, а таксама ажыццяўляюць перавозкі па маршрутах Магілёў — Нікалаеўка і Магілёў — Любуж.
Рачны порт Пінск ажыццяўляе прыгарадныя перавозкі па маршруце Пінск — Крывічы, а таксама экскурсійныя рэйсы па Піне.
Рачны порт Мазыр пераабсталяваў цеплаход "БТ-01", які перавозіць пасажыраў па рацэ Прыпяць па Мазыры і яго наваколлях.
У рачным порце Рэчыцы арганізаваныя прагулачныя рэйсы.
Марына Носава,
БелаПАНМінск, 29 ліпеня 2012
