Форум праводзіцца ў партнёрстве з Міністэрствам эканомікі Рэспублікі Беларусь і Магілёўскім аблвыканкамам у рамках праекта ПРААН «Падтрымка эканамічнага развіцця на мясцовым узроўні ў Рэспубліцы Беларусь», які рэалізуецца пры фінансавай падтрымцы Еўрапейскага саюза.

Мерапрыемствы пройдуць у змешаным фармаце. Удзельнікі разгледзяць найбольш эфектыўныя шляхі і механізмы развіцця дзелавой актыўнасці, якія адпавядаюць задачам МУР, а таксама пытанні ўкаранення інавацыйных падыходаў і інструментаў у прадпрымальніцкую дзейнасць. Будуць агучаны ідэі, думкі і прапановы па тэмах развіцця інавацыйнага прадпрымальніцтва на рэгіянальным узроўні, кааперацыі і кластарных мадэляў, сацыяльным прадпрымальніцтве, «зялёнай эканоміцы» як спосабе павысіць эфектыўнасць рэгіянальнага бізнесу і раскрыць яго новыя магчымасці.

Напярэдадні форума, 8 снежня, у Магілёўскім аблвыканкаме адбудзецца партнёрская сесія «Прыватны бізнес — гэта магчыма». Падчас яе будуць абмяркоўвацца магчымасці і перспектывы развіцця сельскага прадпрымальніцтва ў Магілёўскай вобласці. На сесіі выступяць прадпрымальнікі, прадстаўнікі Магілёўскага аблвыканкама і «Белаграпрамбанка».

У другім рэгіянальным форуме прадпрымальніцтва прымуць удзел прадстаўнікі дзелавой супольнасці, саветаў па развіцці прадпрымальніцтва, мясцовых і рэспубліканскіх органаў дзяржаўнага кіравання, банкаўскай сферы, а таксама міжнародных арганізацый. 

Звязда, 7 снежня 2021